COVALIMA, 24 Outubru 2024 (TATOLI) – Ministériu Agrikultura, Pekúria, Peska no Floresta (MAPPF) distribui mákina ko’a no kuda hare hamutuk 42 ba grupu agrikultór 26 iha Covalima.
Ministru tutela, Marcos da Cruz, dehan Governu prioritiza fahe mákina atu tulun agrikultór sira oinsá bele hasa’e produsaun iha rai-laran hodi hamenus importasaun.
“Apoia mákina kuda no ko’a hare tanba iha tempu okupasaun Indonézia uza de’it karau hodi halai [natar], maibé daudaun ne’e uza tratór fila-rai. Nune’e, ho mákina ko’a no kuda hare bele redús ona kustu selu ema atu kuda hare kada loron ida $5”, Marcos da Cruz hateten hafoin entrega mákina iha edifísiu Agrikultra Covalima, iha Tabakolot, ohin.
“Agrikultura iha kbiit atu hasa’e produsaun hare, maibé daudaun ne’e númeru to’os-na’in tuun, tanba joven sira ladún interese atu halo to’os. Serbisu agrikultura ne’e todan. Habai aan iha loron laran, la’ós tuur iha AC”, governante ne’e realsa.
Hafoin entrega ekipamentu hirak ne’e, ministru husu atu disponibiliza formasaun téknika oinsá halo viveiru no utiliza mákina ko’a no kuda hare ho kuidade, nune’e bele hasa’e produsaun.
Prezidente Autoridade Munisipál Covalima, Miguel Armanda Cardoso, dehan ho ekipamentu modernu ne’ebé MAPPF entrega ba agrikultór sira bele hasa’e produsaun iha rai-laran. “Ita haree ekipamentu ne’e sufisiente ona, iha ona mákina kuda no koa hare”, nia dehan.
Nia salienta katak problema ne’ebé iha mak falta hasa’e produsaun iha rai-laran, nune’e presiza halo revolusaun mentalidade, tanba joven barak lakohi halo serbisu halai natar no halo to’os.
Xefe Grupu Hadomi Agrikultura, Mário Ferreira, reforsa katak hafoin simu ekipamentu agríkola, hanesan xefe grupu iha responsabilidade atu kuidadu mákina no serbisu maka’as atu hasa’e produsaun hare iha Covalima.
“Molok ne’e ami halai natar ho manual, maibé daudaun ne’e ita tama ona agrikultura moderna, buat hotu uza mákina, tanba ne’e grupu sira presiza atu serbisu maka’as”, nia dehan.
Grupu agrikultura 26 ne’ebé simu mákina ne’e mak hanesan Moris foun, Biagou Halibur, Hadomi Agrikultura, Aimanas, Lakolen, WHO, Mota-ain, BBR, Kalma, Loelima, VCO, Moris Foun B, Hae- oan, Preled, Beilaku Huduk, Moris Foun A, Fuan Domin, Loro Biduk, Sudar, Fatulaen, Halibur Juventude, Halibur, Haliboot, Dudu Moris, Sadia no Sukaer Belan.
Rekorde katak Banku Mundiál disponibiliza, foin lalais ne’e, ekipamentu agríkola unidade 164 no MAPPF sosa tratór 25 atu apoia ba grupu agrikultór sira iha munisípiu atu hasa’e produsaun agríkola. Materiál sira ne’e mak tratór boot, hand tractor, mákina kuda no ko’a hare.
Notísia relevante: Primeiru-Ministru lansa distribuisaun ekipamentu agríkola ba munisípiu sira
Jornalista: Celestina Teles
Editora: Maria Auxiliadora
