Utilizasaun kartaun biométriku iha eleisaun presiza regula ho Dekretu Governu
DILI, 20 Juñu 2026 (TATOLI)–Diretór Jerál Sekretariadu Tékniku Administrasaun Eleitorál (STAE), Elveiro Fernandes, hateten, utilizasaun kartaun biométriku iha eleisaun presiza regula ho lejizlasaun ruma tuir kompeténsia Governu nian.
“Lei eleitorál ne’e ko’alia de’it prinsípiu jerál no norma fundamentál sira. Iha nia implemetasaun ita presiza Dekretu Governu hodi estabelese prosedimentu tékniku sira. Maibé inisiativa bele maihusi MAE Ministériu Administrasaun Estatál (MAE) no STAE hanesan implementadór maibé desizaun atu aprova Dekretu Governu ne’e husi Konsellu Ministru,” Diretór Jerál hato’o ba Ajénsia TATOLI, via telefónika, Sábadu ne’e.
STAE daudaun ne’e halo hela atualizasaun baze dadus ba eleitór ho baze biométriku no renova ona kartaun eleitorál, ho hanoin ida katak iha eleisaun hirak tuir mai bele utiliza ona kartaun eleitór foun ne’e iha prosesu votasaun.
Notísia relevante : STAE halo RE-ABD ba kartaun biométriku hamutuk 352.710
Dirijente ne’e dehan, eleitór balun ne’ebé seidauk atualiza baze dadus ba biométriku nafatin uza kartaun eleitorál tuan. Ein prinsípiu kuandu eleitór ida seidauk atualiza nia dadus biométriku no renova nia kartaun eleitorál, sei permite atu vota ho kartaun tuan, maibé presiza estabelese mekanizmu atu obriga eleitór ne’e atualiza sira-nia dadus biométriku no renova kartaun depois períodu eleisaun termina.
“Ezemplu ida mak kuandu eleitór ne’ebé utiliza kartaun eleitorál tuan iha períodu votasaun, Ofisiál Identifikasaun sei halo kuak kartaun, nune’e ba oin labele utiliza ona no tenke ba atualiza nia dadus biométriku hodi atribui fali kartaun eleitór foun. Mekanizmu ida-ne’e presiza regula iha Dekretu Governu kona-ba funsionamentu no prosesu votasaun sira,” responsávél STAE esplika.
Iha sorin seluk, Ministru Administrasaun Estatál, Tomás Cabral, hateten, nia parte seidauk bele fó komentáriu barak kona-ba utilizasaun kartaun biométriku iha eleisaun.
“Imi ba esplora uluk tiha. Ita seidauk halo desizaun to’o iha ne’ebá. Ita labele la’o uluk ba ida-ne’e. Enkuantu Primeiru-Ministru seidauk hato’o ba Prezidente Repúblika, ita la’o uluk tiha, ida-ne’e kompeténsia Primeiru-Ministru nian,” Ministru tenik.
STAE halo atendimentu públiku ba atividade resenseamentu eleitorál no atualizasaun baze dadus biométriku hahú Jullu 2024 to’o agora emite ona kartaun hamutuk 352.710.
Númeru ne’e kompostu husi eleitór foun hamutuk 44.255 no atualizasaun dadus biométriku hamutuk 308.455, ne’ebé agrupa ba Munisípiu Aileu 18.853, Ainaru 21.232, Ataúru 4.315, Baukau 43.539, Bobonaru 26.864, Kovalima 20.993, Dili 77.713, Ermera 21.634, Lautein 23.632, Likisá 19.615, Manatutu 20.905, Manufahi 15.837, Oekusi 18.025 no Vikeke 19.553.
Nune’e, sei falta eleitór hamutuk 617.574 ka 66,68% maka seidauk atualizadu, husi totál eleitór hamutuk 970.284 ne’ebé rejistadu iha baze dadus STAE.
Jornalista : Osória Marques
Editora : Julia Chatarina
