Komisaun C husu MTK kria armajen deskaregamentu iha fronteira

DILI, 24 outubru 2024 (TATOLI)—Deputadu membru komisaun C trata asuntu Finansa Públika iha Parlamentu Nasionál (PN), António da Conceição ‘’Kalohan’’, sujere Ministériu Transporte no Komunikasaun (MTK) atu koordena ho liña ministériu sira kria armajen deskaregamentu iha fronteira ba kaminoeta tula sasán tama-sai Timor-Leste.
Notísia Relevante: OJE 2025: MTK prioriza konklui instalasaun fibra ótika kabu submarinu
“Husu Ministériu Transporte no Komunikasaun (MTK) ho Koordensaun ho Ministériu Komérsiu no Indústria (MKI) no Ministériu Koordenadór Asuntu Ekonómiku bele halo armajen deskaregamentu tipu ALFANDEGA nian, hanesan daudaun iha portu, iha fronteira, atu evita movimentu ida ho karga pezada tama to’o iha Timor-Leste la selu buat ida ba, uza estrada sira-ne’e hotu ho pezu ne’ebé liu, estraga ita-nia estrada sira. Ita bele halo polítika ida-ne’e ka lae,” Nia hato’o liuhusi audiénsia públika konjunta ba proposta Orsamentu Jerál Estadu (OJE) 2025 husi MTK iha sala plenária PN, kinta ne’e.
Nia dehan, ida-ne’e fó oportunidade ba transporte nasionál atu bele halo transporte materiál sira-ne’e husi fronteira ba iha munisípiu sira.
Ministru Ministériu Transporte no Komunikasaun (MTK), Miguel Manetelo, apresia ba sujestaun husi membru órgaun lejislativu kona-ba atu harii armazen deskaregamentu iha fronteira hodi haree ba kamioneta sira tula sasán tama husi fronteira terreste mai Timor-Leste.
“Karreta sira tama husi fronteira, kona-ba atu harii armazen, ami sei haree posibilidade halo koordenasaun, mais loloos ohin la mai iha ne’e karik, ha’u iha Konsellu Ministru ohin duni aprezenta dekretu-lei kona-ba tarefa ba kamioneta sira ne’ebé mak tula sasán liuhusi fronteira la’ós de’it iha Motain maibe mós iha Mota-Masin,’’nia dehan
Tanba, nia dehan, Ministériu Finansa instala ona baskula automátika iha ne’eba nune’e karreta hotu ne’ebé tama mai tenke tetu, no klasifikasaun oioin maibé proposta dekretu ne’ebé agora iha hela Konsellu Ministru másimu todan ne’ebé ita autoriza ne’e tonelada 17, ne’e brutu inklui todan karreta nian.
Karreta sira roda 12 esu tolu ka haat nia todan de’it to’o tonelada sia hanesan ne’e, se Timor-Leste autoriza iha proposta dekretu-lei ne’e tolenada 17 signifika nia so bele tula tan naha ho todan tonelada ualu.
“Ida-ne’e mak ita hanoin atu regulariza, maibé sujestaun ohin atu harii armazen iha ne’eba se hamutuk ho komérsiu no finansa atu bele haree posibilidade ida-ne’e,” nia dehan.
Jornalista : Nelson de Sousa
Editór : Cancio Ximenes

