DILI, 24 outubru 2024 (TATOLI)–Membru Rede Advokasia iha Asia Justice and Rights (AJAR), Inocencio Xavier, hateten Sekretáriu Estadu Toponímia no Organizasaun Urbana (SEATOU), Germano Santa Brites, hadau Prezidente Autoridade Munisípiu Dili, Gregório Saldanha, nia kompeténsia atu jere munisípiu Dili.
Inocencio Xavier hateten, to’o lia hirak ne’e nakait ho asaun SEATOU nian halo agresaun vízika hasoru vendedór sira iha área Kampung Baru, Rotunda Comoro, iha kuarta (23 outubru 2024).
“Serbisu ne’ebé SEATOU halo ne’e servisu Autoridade Munisipál Dili (AMD) nian. Prezidente AMD mak jere munisipiu Dili nian, la’ós SEATOU nia kompetensia. SEATOU tama sala ema-nia kintal laran, ema-nia kna’ar nia ba foti, depoiz maun Gregorio Saldanha hanesan Autoridade Munisípiu Dili, nia halo saída. SEATOU mak foti hotu, tama arbiru. Merkadu iha Manleuana no Taibesi la iha kondisaun, nia ba haree ka lae,” Inocencio Xavier hateten ba jornalista sira liuhis konfereénsia imprensa, iha Faról.
Membru rede advokasia ne’e husu ba Prezidente Autoridade Munisipál Dili, di’ak-liu sees hodi husik kna’ar no husik ba SEATOU mak halo no foti hodi hala’o servisu.
Inocencio Xavier kestiona, SEATOU rezolve ona merkadu Taibesi ho Manleuana ho kondisaun ka lae, tanba nia lori ema ba hanesan so’elixu iha ne’ebá, nia hatudu nia premanizmu ne’e hatudu inkapasidade.
Tuir nia, situausaun ida-ne’e bebeik ona, até que Prezidente Repúblika ko’alia Sekretariu Estadu ne’e la rona.
“Asaun horikalan ne’e demonstra inakapsidade lideransa. Funsionáriu sira-ne’e nia orientasaun husi xefe la klaru. Sira baku malu hanesan ema preman sira, hanesan bandidu tau malu iha bar ne’e. Ida-ne’e la’ós ajente Estadu la halo modelu sira hanesan horikalan. Ami kondena atu horikalan husi Sekretariu Estadu Asuntu SEATOU hasoru vendedor sira,” nia dehan.
Nia mós lamenta, profisionalizmu membru PNTL tenke atua ho profisionál ba iha situasaun sira iha terrenu.
“Entaun, tenkieloke prosesu investigasaun, foti sira-ne’ebé baku malu ne’e. Ha’u mós kondena polísia sira-ne’ebé iha kotuk la halo asaun ruma hodi hapara. Ema baku malu ona mak sira foin tiru pistola. Lolos ne’e sira baku no dudu malu ne’e polisia atua ona. Dalaruma orientasaun husi komandu mós la klaru, tanba ne’e mak lakohi atua. Se horisehik mak halo atuasaun ruma, kazu la sai hanesan horikalan. Tanba, parte ida PNTL husik sira-nia kna’ar iha diskusaun entre vendedór no funsionáriu SEATOU ba risku ataka malu, tuir lolos polisia atua ona. Ida-ne’e iha polisia nia oin, fraglante delitu. Tenke mós loke prosesu investigasaun ba polísia sira-ne’e,” nia lamenta.
Nia fó ganoin ba negosiante sira-ne’ebé faan iha área Elemloi, Bairru Pité no rotunda Comoro atu fó espasu ba ema la’o, muda ba kotuk nune’e sosa-na’in sira mós tenke para karreta ho motorizada ho di’ak, bainhira ba sosa sasán.
Nia sujere ba sosa-na’in sira hakarak para karreta no motor sosa kedas, entaun sosa-na’in sira mós kontribui. Tuir loloos polisia mos hare ba ida-ne’e no AMD nia Diresaun Transporte Terrestre halo estasionamentu hodi ema bele para ba no selu taxa atu kontribui ba reseita Estadu.
Nia rekomenda ba SEATOU atu bele trata ema ho dignu tanba ema-ne’ebé matenek halo asaun ho responsabilidade no akontabilidade, tanba ne’e mak aktu ida-ne’e la respeita ema seluk nia kompeténsia ne’ebé parte ida tendensia husi mápratika.
“Dala ida tan, ha’u fó hanoin ba SEATOU atu hatene nia kompeténsia. Funsionáriu sira iha SEATOU atu hatene trata ema. Loos duni, sira muda beibeik ona, maibé buka hatene, tanbasá ema ba nafatin faan iha fatin sira-ne’e. Família husi SEATOU mós nia familia sira mós faan sasán sira iha merkadu.” Nia hateten.
Aktu hasoru vendedór sira-ne’e ultrapasa kapasidade institusionál, uza forsa no rekursu povu nian, hodi baku povu tanba uza aidonan boot.
Nia husu ba Prezidente Repúblika, Primeiru-Ministru, Parlamentu Nasionál no Provedoria Direitu Umanu no Justisa atu tau matan kona atuasaun SEATOU nian.
Jornalista : Jesuína Xavier
Editór : Cancio Ximenes
