DILI, 24 outubru 2024 (TATOLI)–Sekretariu Estadu Komunikasaun Sosiál (SECOMS, sigla portugés), Expedito Dias Ximenes, hateten SECOMS prevee millaun $6.038.535 iha proposta OJE 2025, hodi implementa planu prioridade tolu hanesan Funcionamentu no desenvolvimento institusionál, dezenvolvimento setor komunicação sosial no desenvolve ba sistema komunikasaun institusionál.
Iha proposta OJE 2025 nian ne’e aloka ba saláriu vensimentu $1.619.260, bens no serbisu $767.835, tranferénsia públika $2.751 no kapital dezenvolvimentu $900.000.
“SECOMS iha programa tolu, subprograma hitu no atividade 26 hodi implementa iha 2025. Programa prioridade ba 2025 mak servisu hamutuk ho Konsellu Imprensa atu fó kapasitasaun formasaun ba jornalista sira, sei fortifika sentru formasaun suku ne’ebé iha no haforsa Rádiu Komunidade 19 iha teritóriu laran. Atividade seluk mos apoiu jornal lima hanesan Diariu Nasionál, Timor Post, STL, Dili Post no Independente,” Sekretáriu Estadu Komunikasaun Sosiál (SECOMS), Expedito Dias Ximenes, hateten ba jornalista sira, hafoin audiénsia ho deputadu sira komisaun G, iha antigun edifisiu Ministériu Finansa.
OJE 2025 nian SECOMS iha ona títulu orsamentu rasik ne’ebé durante ne’e orsamentu SECOMS nian prosesamentu liuhusi Prezidensia Konsellu Ministru, entaun agora ba oin SECOMS iha ona nia orsamentu rasik.
Proposta OJE 2025 ba SECOMS millaun $6.038.535 ne’e, millaun $2.3 ba Rádiu Televizaun Timor-Leste, Empreza Públiku (RTTL, E.P) hodi halá’o kna’ar hanesan orgaun Estadu nian no Agência TATOLI, Instituisaun Públika (TATOLI, I.P) iha orsamentu rihun $667 ba anu fiskál 2025.
Sekretáriu Estadu ne’e hateten, Governu sei aprezenta no Parlamentu sei halo diskusaun kona-ba proposta orsamentu sira-ne’e hodi bele aprova atu Prezidente Repúblika promulga, atu nune’e atividade SECOMS, RTTL, E.P no TATOLI, I.P bele la’o.
Governante ne’e hateten, deputadu sira mós apresia ba ezekusaun OJE husi SECOMS, RTTL, E.PATOLI, I.P nian ho di’ak.
“Mai hato’o ezekusaun Orsamentu Jerál Estadu 2024 nian no OJE 2025. Ami haksolok tebe-tebes, tanba distintu deputadu sira hato’o sira-nia apresiasaun ba iha ezekusaun 2024 ne’ebé di’ak, to’o ohin atinje 83% ne’ebé inklui ona obligasaun no kompromisu. Hein katak hela de’it fulan rua, OJE SECOMS nian bele atinje to’o 90%,” nia dehan.
Nia mós relata OJE 2024 millaun $6 inklui Transferénsia Públika ne’e Rádiu Televizaun Timor-Leste no TATOLI nian to’o loron 23 outubru 2024 ne’e atinje ona 78%.
Jornalista : Jesuína Xavier
Editór : Cancio Ximenes
