COVALIMA, 25 Outubru 2024 (TATOLI) – Prezu ida ho naran Fortunato Gomes, tinan 71, hakotu iis iha prizaun Suai, pur volta tuku 22h00, iha loron 24 Outubru, informa Komandante PNTL Covalima, Superintendente Calisto Gonzaga.
Komandante ne’e relata katak matebian hakotu iis iha kalan no tuir oráriu prizaun, dadeer tuku 06h00 bainhira xefe grupu bolu nia la hadeer no ka’er nia isin malirin, hafoin ne’e xefe grupu mós informa ba guarda prizionál sira.
“Komandu simu informasaun husi guarda prizionál Suai iha tuku 08h00 kona-ba prezu na’in-ida hakotu iis. Hafoin simu informasaun komandu orienta kedan ba seksaun investigasaun bá iha prizaun Suai hodi foti matebian lori bá iha ospitál Referénsia Suai, maibé nia iis laiha ona”, Calisto Gonzaga informa iha Santa Rosa, ohin.
Tanba ne’e, komandu seidauk hatene kauza husi matebian nia mate, nune’e parte investigasaun presiza atu halo estudu liuhusi autópsia, maibé família la aseita atu halo no entrega ona ba família atu halo prosesu fúnebre tuir kultura Covalima.
Matebian hetan pena efetiva ba prosesu kazu omisídiu no kumpre pena hahú iha 2022 no hakotu iis iha loron 24 Outubru ne’e.
Enfermeira iha sala emerjénsia ospitál Referénsia Suai, Sandra Pacheco, konfirma katak bazeia ba rezultadu ezaminasaun husi médiku la identifika sinál hanesan kanek no tohar ruma iha matebian nia isin-lolon tomak, tanba ne’e ospitál la hatene nia kauza husi mate tanba médika halo konsulta matebian iis laiha ona.
“Ami la hatene motivu husi sidadaun nia mate, tanba liuhusi ezaminasaun ita la identifika buat ruma, nune’e nia diagnóstika ami tau kauza deskoñesidu, tanba sidadaun ne’e konsulta ita la hatene nia kauza husi mate”, dehan.
Jornalista: Celestina Teles
Editora: Maria Auxiliadora
