COVALIMA, 25 Outubru 2024 (TATOLI) – Komandu Polísia Nasionál Timor-Leste (PNTL) Covalima bandu sidadaun sira hemu tua no toka múzika iha simitériu públiku iha ambitu selebrasaun loron finadu.
Kamandante PNTL Covalima, Superintendete Polísia Calisto Gonzaga, dehan komandu iha ona planu atu halo operasaun hodi fó segurasaun ba sidadaun sira hodi selebra loron matebian, maibé sei hein desizaun husi Komandu Jerál PNTL.
“Ita iha ona planu operasaun atu garante seguransa ba sidadaun sira ne’ebé hakarak selebra loron bfinadu, maibé presiza hein orientasaun. Hafoin simu orientasaun presiza konvoka reuniaun hodi prepara seguransa”, Calisto Gonzaga dehan iha Santa Rosa, ohin.
Atu garante seguransa, komandu koopera ho Unidade Espesiál, Batallaun Orden Públika (BOP), Unidade Patrullamentu Fronteira (UPF), Unidade Polísia Máritima (UPM) no F-FDTL.
“Molok komandu husu apoiu seguransa husi unidade seluk tenke konvoka reuniaun hodi halo koordenasaun, ne’ebé reuniaun sei hala’o iha semana ikus Outubru ne’e hodi diskute asuntu seguransa atu selebra loron finadu. Komandu sei koloka membru seguransa sira iha semitériu públiku ne’ebé sidadaun sira atu tau ai-funan, tanba finadu ne’e loron atu tau ai-funan ba matebian sira, la’ós fatin atu hemu tua no toka múzika”, dehan.
Membru efetivu ne’ebé prepara atu koloka bá iha simitériu públiku hamutuk na’in-100.
Jornalista: Celestina Teles
Editora: Maria Auxiliadora
