VIQUEQUE, 26 outubru 2024 (TATOLI)- Xefe Sentru Ossú, munisípiu Viqueque, Azevendo da Cruz Amaral, informa, hahú husi fulan-janeiru to’o outubru ne’e sentru saúde Ossú rejista kazu asu tata abitante na’in-15 maibé la indika ba raiva ka asu-bulak.
“Ami rejista ona komunidade asu tata ne’e na’in-15, maibé ami teste la indika ba rabies nian. Tanba ne’e ami fó tratamentu ai-moruk tetanu topsuit ba ita-nia komunidade sira-ne’ebé asu tata”, Xefe Sentru Saúde Ossú, ba TATOLI, iha postu Ossú, sábadu ne’e.
Nia dehan, durante Sentru Saúde Ossú tau atensaun ba kazu Raiva bainhira asu tata mai sentru saúde pesoal saúde fó vasina Tetanu Topsoit.
“Asu tata ona ema na’in-15. Ita teste seidauk iha sinál kazu raiva. Ha’u sente kazu raiva ne’e seidauk tama iha postu Ossú,” nia afirma.
Alende ne’e, Azevendo relata, sentru saúde Ossú rejista kazu moras husi fulan-janeiru to’o fulan-outubru kazu ISPA hamutuk rihun 3.183, kazu moras tee-been agudu hamutuk 520, kazu moras eskavies hanesan moras kulit 452, kazu pneumonia hamutuk 77, kazu tee-been ho raan hamutuk 18 no kazu dengue na’in-tolu.
“Durante ne’e ami dó tratamentu ba ita-nia pasiente sira ho di’ak. Nune’e mós ami rejista kazu asidente trafiku rejista hamutuk 40, moras esbiai ka relasaun seksual hamutuk 24, durante ami fó tratamentu iha sentru saúde”, nia realsa.
Kona-ba, ai-moruk nia dehan, daudauk ne’e estoke ai-moruk iha sentru saúde Ossú sei sufisiente hodi fó abitante sira iha postu Ossú.
“Ami iha ai-muruk tipu alvenazol maka stouk hotu, maibé ai-moruk ne’e la’o esensial. Ba ai-moruk esensiál sira ne’e kada fulan ami sempre relata ne’ebé kuandu stock hotu ne’e distribui mai sentru saúde. Iha trimestre datoluk ami-nia ai-moruk sufisente hela,” nia relata.
Notisia relevante:Servisu veterináriu MAPPF halo intervensaun lalais ba moras raiva
Jornalista: Vitroino Lopes da Costa
Editór : Rafael Ximenes de A. Belo
