DILI, 28 outubru 2024 (TATOLI) – Assosiasaun Futeból hamutuk 13 apresia Federasaun Futeból Timor-Leste (FFTL) ne’ebé semana kotuk realiza kongresu extraordináriu hodi hili komite independente la’o ho susesu.
“Ami nu’udar membru FFTL husi Assosiasaun Futeból Munisipál no Profisionál hamutuk 13, hakarak deklara ba públiku no reafirma ami-nia pozisaun relasiona ho Kongresu Estraordináriu iha loron-sábadu loron 26 fulan-outubro la’o ho susesu, no tenke avansa ba oin,” hateten Prezidente Assosiasaun Arbitrajen Nivio da Costa Fernandes ba Agência TATOLI iha edifisiu FFTL, ohin.
Assosiasaun 13 ne’ebé hato’o sira nia pozisaun ne’e mak hanesan, Asosiasaun Futeból Bobonaro, Asosiasaun Futeból Baucau, Asosiasaun Futeból Lautem, Asosiasaun Futeból Liquiça, Asosiasaun Futeból Dili Oeste, Asosiasaun Futeból Remalau Ainaro, Asosiasaun Futeból Oe-cusse Asosiasaun Futeból Viqueque, Asosiasaun Futeból Árbitrajem Timor-Leste, Asosiasaun Futebol Feminino, Asosiasaun Futeból Juvenil, Asosiasaun Futebol Salaun (FUTSAL) no klube kampiaun Primeira Divizaun Karketu Dili FC.
Iha deklarasaun ne’e Assosiasaun sira fundamenta ho pontu importante lima mak hanesan.
- Ami agradese no fó apresiasaun ba entidade sira-hotu hanesan:
Prezidente Interino FFTL Tenente-Jeneral Falur Rate Laek, membru ezekutivu sira no membrus Komisaun Organizadora, ne’ebé ezerse ona funsaun ho responsabilidade tomak hodi lidera asembleia tuir kompetensia no protokolu kongresu la’ó ho di’ak no sussesu tuir espetativa públiku nian hodi salva futeból nasionál atu labele hetan sansaun no suspensaun hosi FIFA no AFC liu hosi votu konfiansa Kongresista mak hanesan; Asosiasaun Munispál, Profesional no Klube hamutuk 17.
Ba partisipasaun reprezentantes Federasaun Futeból Internasional sira hanesan FIFA, AFC no AFF, ami apresia tebes ho ita-boot sira-nia apoiu no parseria ne’ebé kontinua iha esforsu ida-ne’e hodi akompanha prosesu tomak iha realizasaun kongresu extraordinária 2024.
Ami louva no fó apresisaun tomak ba autoridade seguransa PNTL no F-FDTL, ne’ebé hala’o ona sira-nia kna’ar ho profesionalizmu hodi fó seguransa másimu hosi hahú, durante no to’o remata.
Ami afirma mós ami-nia pozisaun tomak hodi depozita konfiansas másimu ba Prezidente Interinu FFTL Tenente-Jeneral Falur Rate Laek atu kontinua lidera FFTL to’o ba iha kongresu extraordináriu eletivu ba pozisaun Prezidente Ezekutivu FFTL no membru ezekutivu na’in-ida, ne’ebé deside ona sei realiza iha loron-11 fulan-janeiru tinan 2025.
- Haktuir ba estatutu FFTL Artigo 26° Alinea 1, katak “Kongresu mak reprezenta autoridade suprema no lezislativa FFTL nian” ho nune’e, ami husu ba prezidente sesante sira hosi Asosiasaun Futeból Ainaro Giovanio Bucar, Viqueque Cosme Sarmento no Árbitrajem Aniceto Berlelo ne’ebé Komisaun Organizadora bandu ka la autoriza atu hola-parte iha Kongresu Estraordináriu loron 26 fulan-outubru 2024, ho razaun naran laiha lista delegadus no legalmente laiha ona autoridade formál ba lidera asosiasaun sira.
Tamba ne’e, ami husu atu labele tan reprezenta asosiasaun tolu (3) ne’e iha kualker atividades FFTL nian, no FFTL rasik rekoñese mak estrutura atual ne’ebé eleitu iha kongresu asosiasaun ho mandatu ba tinan 2024-2028:
Prezidente Asosiasaun Futeból Ainaro, Inácio da Cruz Prezidente Asosiasaun Futeból Viqueque Jaime Sarmento Prezidente Asosiasaun Arbitrajem Futeból Timor-Leste, Nívio da Costa Fernandes no refere ba Estatuto Asosiasaun Artigo 38° Alinea 1, katak Prezidente mak reprezenta asosiasaun legalmente”, signifika ami na’in tolu maka iha lejitimidade atu reprezenta asosiasaun idaidak nian.
- Husu ba Komisaun Nasionál Desporto (KND) atu labele halo interferénsia ho kualker forma ba FFTL no nia membru sira, tamba FFTL sei jere ninia asuntu sira ho independente no sei garante katak ninia asuntu rasik la hetan influénsia hosi terseira parte ruma, haktuir iha estatuto FFTL Artigo 50 alinea 3 kona-ba “Neutralidade no Indenpendensia Institusional”.
- Lamenta tebes ho asaun ne’ebé hatudu husi asosiasaun futebol haat (4) mak hanesan: Dili-Leste, Ermera, Manatuto no Covalima ne’ebé ho intensaun no tentativa atu Boikota Kongresu Estraordináriu iha loron-sábadu dia 26 outubro 2024 liu husi sira nia asaun ne’ebé la obdese ba regras no prosedimento protokolu ho Kongresu Estraordináriu mak hanesan la hola parte iha aprovasaun ba Agenda Kongreso ho nune Meza Asembelia ho kompetensia tomak deside hasai sira husi fatin kongresu (Kronologia Detalho bele Konfirma ho Presidente Meza Asembleia no Komisaun Organizadora).
Nune’e husu ba Prezidente Interino Federasaun Futeból Timor-Leste ho membru ezekutivu hodi tau konsedeirasaun hodi aplika sansaun no expulsaun baseia ba desizaun kongresista iha Kongresu Estraordináriu iha loron-sábadu dia 26 outubro 2024.
- Ba Prezidente Asosiasaun Futeból Dili-Leste Aleixo Cobra, ami husu atu respeita no labele halo atake pesoál ne’ebé laiha relasaun ho atividades futeból hodi aproveita media sosiál facebook para tenta harahun imajen Prezidente Interinu FFTL Tenente-Jeneral Falur Rate Laek nian iha públiku liuhosi dezfama no insulta, ne’e hahalok ida ne’ebé imoral (la edukativo) no hamonu dignidade kulturál nasaun nian, tanba Tenente-Jeneral Sr. Falur Rate Laek mós nu’udar lider rezistensia ida iha prosesu luta libertasaun nasional ba povu no rai doben RDTL.
Karik ita-boót senti sai vitima tamba hasoru agresaun fizika ruma iha Kongresu Estraordináriu liubá, bele halo keixa ba parte justisa no ami prontu sai sasin hodi defende Prezidente Interinu FFTL Tenente-Jeneral Falur Rate Laek iha kualker momentu no iha ne’ebé de’it.
Karta FIFA nian ba FFTL
Korespondénsia ne’e hamosu tópiku oioin ne’ebé liga ba situasaun atuál FFTL nian, inklui realizasaun kongresu extraordináriu ne’ebé hala’o ona iha Dili iha loron 26 fulan-utubru 2024.
“Kona-ba ida-ne’e, ami hakarak refere ba karta konjunta FIFA/AFC ho loron 04 fulan-marsu 2024, ne’ebé fornese diretiva sira ne’ebé klaru ba FFTL. Hanesan ita-boot sira hatene, hafoin fallansu atu organiza eleisaun sira ne’ebé planeia ona ba Kongresu FFTL ba dala-sia ne’ebé hala’o iha loron 10 fulan-janeiru 2024 iha Dili, Planu Asaun ida estabelese hodi asegura, entre buat sira seluk, katak FFTL halo revizaun ba nia Estatutu sira no Kódigu Eleitorál,” tenik karta FIFA nian ba FFTL ne’ebé TATOLI asesu.
Implementasaun prosesu ne’e ho susesu sei fó dalan ba FFTL atu hala’o eleisaun ba kargu Prezidente no membru Komité Ezekutivu ba durasaun mandatu ne’ebé restu.
“Ami hakarak subliña termu sira hosi komunikasaun ne’ebé haruka liuhosi email hosi FIFA ba FFTL iha loron 19 fulan-setembru tinan 2024, hodi afirma fali nesesidade observasaun nian ba roteiru ne’ebé estabelese ona no FFTL koopera ho dilijénsia ho FIFA no AFC hodi entrega ho susesu kongresu extraordináriu iha loron 26 fulan-outubru 2024, la ho mudansa sira seluk, ne’ebé sei permite kumprimentu hosi objetivu sira ne’ebé estabelese hamutuk,” tenik iha nota ne’e.
Nota ne’e dehan tan, “ami mós aproveita oportunidade ida-ne’e atu konfirma katak delegadu sira hosi FIFA no AFC tuir Kongresu Estraordináriu iha loron 26 fulan-outubru 2024”.
Esensiál atu hanoin hikas katak, durante kongresu ikus ne’ebé mak FIFA no AFC partisipa, membru balu envolve iha hahalok disruptivu, interompe prosesu sira no obstrui progresu. Asaun sira hanesan ne’e la aseitavel no iha risku atu estraga integridade kongresu nian no objetivu importante sira ne’ebé hatuur hamutuk.
“Tanba ne’e ami husu ba partisipante hotu-hotu atu ezerse restrisaun no koopera ho maneira konstrutiva, hodi haburas respeitu ba malu no orden di’ak durante kongresu extraordináriu 26 Outubru 2024,” hakotu.
Jornalista: Hortencio Sanchez
Editór: Florencio Miranda Ximenes
