COVALIMA, 28 Outubru 2024 (TATOLI) – Servisu Munisipál Edukasaun (SME) Covalima hahú maiu entre juñu gasta ona osan $ 266,196.42 ba implementasaun programa Merenda Eskolár husi totál orsamentu $ 1,016.964,48 ne’ebé ezekuta husi Ekipa Jestaun Programa (EJP).
“Orsamentu PME maiu-juñu ita gasta ona osan $ 266,196.42, maibé la inklui ezekusaun orsamentu ba jullu to’o setembru ne’ebé foin rekolla relatóriu ezekusaun nune’e ita seidauk hatene nia ezekusaun,” Xefe Departamentu Jestaun Programa Edukasaun, Gregório Ferreira Afonso dehan, iha salaun AMC, ohin.
Dirijente ne’e dehan, tuir kalendáriu iha trimestre ba daruak fó han alunu sira fulan rua hahú maiu-juñu ho loron efetivu 32 totál alunu EBC 16,026 ho nia proposta orsamentu $ 215.389.44 no alunu pre-eskolar 10,768 nia orsamentu $ 23,896.32 ne’ebé gasta ona osan $ 266,196.42, saldo iha banku sei hira seidauk bele fo sai, tanba prosesu ezekuzaun sei la’o no seidauk hatene osan hira mak atu fo fila ba kofre Estadu.
“Konserteza osan balun ita sei fo fila ba kofre Estadu, tanba prosesu implementasaun PME tarde tuir lolos hahú fevereiru maibé ita foin hala’o lansamentu iha maiu ne’e,” nia dehan.
Tan ne’e, kona-bá relatóriu trimestre ba datoluk fó han alunu ho loron efetivu 66, maibé sei hein relatóriu hodi hatene totál alunu ne’ebé han no totál alunu la han edukasaun sei rekolla hela relatóriu atu hatene totál nia ezekusaun .
Nune’e Edukasaun Covalima submete ona pedidu ba finansa munisipál atu ezekuta orsamentu PME trimestre ba haat Outubru-Novembru ne’ebe orsamentu PME ba alunu pre-eskolár orsamentu $ 24,872.40 no ba alunu EBC $ 123,759.72 nia ezekusaun la’o hela.
Tuir loloos Programa merenda eskolár implementa iha eskola 148 ho totál alunu hamutuk 17.804 ne’ebé alunu husi pre-eskolár 1.878 no ensinu báziku Centrál iha alunu 16.017.
Alokasaun orsamentu ba PME iha 2024 hamutuk 1,016.964,48 ne’ebé kada estudante iha direitu ha sentavu 0,42 hahú iha loron segunda to’o sesta ho totál loron efetivu fó han 181, tanba kestaun orsamentu tarde fó han alunu durante loron 139.
Nia fó hanoin, Edukasaun Covalima lansa programa Merenda Eskolár iha eskola Bázika Centrál Suai –Loro iha loron 13 maiu liubá.
Jornalista: Celestina Teles
Editór: Rafael Ximenes de A. Belo
