DILI, 28 outubru 2024 (TATOLI)–Ministru Agrikultura, Peska, Pekuária no Floresta (MAPPF), Marcos da Cruz, informa MAPPF rekanaliza irrigasaun atu fornese bee ba natar ektare 1.600 iha tinan 2025 iha territoriu, nune’e agrikultór sira bele halai natar no halo produsaun.
“Iha tinan ne’e, ita hodi eskavadór kee rai ka bee-dalan (irrigasaun) ba natar abandonadu ektare 1600 hodi fornese bee ba natar. Iha duni kanalizasaun bee, maibé kotuk tiha, ita hadi’a tiha, entaun agora rai sira funsiona ba kultivu. Meiu sira-ne’e mak ita buka ba área kultivu atu aumenta produsaun,” Ministru Agrikultura, Peska, Pecuária no Floresta (MAPPF), Marcos da Cruz, ba jornalista sira, iha Comoro.
Governante ne’e argumenta, natar abandonadu ne’e Governu tenke kria infraestrutura bázika ba irrigasaun sira-ne’e inklui ida mak iha irrigasaun Maliana II.
Ezemplu, nia dehan, agora natar abandonadu ne’e hanesan iha Maliana nian ektare 400 mak funsiona no ektare 600 abandonadu, ida-ne’e rai-maran hela tanba ne’e mak bee ne’ebá (Maliana II) tenke mai.
Tanba ne’e, nia hateten, Governu iha planu sei asina akordu ba iha irrigasaun Uatuwa-Gariuai-Baucau no Irabere-Lautém.
“Ita ba Lospalos iha área Seiçal nian natar barak abandonadu, tanba problema bee, iha Irabere nian mós rai barak natar nian mak abandonadu, hanesan mos Iliomar nian. Ita tenke halo konstrusaun ba irrigasaun. Ida mak ita uza ita-nia eskavadora hodi fornese bee ba natar sira ne’e,” nia dehan.
Governante ne’e informa, iha territóriu laran ne’e iha totál natar hamutuk ektare 44.500 mak abandonadu.
Jornalista : Jesuína Xavier
Editór : Cancio Ximenes
