Tinan 2025: MI kontinua fó prioridade konstrusaun-reabilitasaun postu seguransa iha fronteira

DILI, 28 outubru 2024 (TATOLI)—Ministériu Interiór (MI) iha proposta Orsamentu Jerál Estadu (OJE) 2025 prevee millaun $15-resin, kontinua fó priordade ba kontrusaun no reabilitasaun infraestrutura postu seguransa iha fronteira terrestre no mós ba kuartél PNTL munisípiu no eskuadra sira iha territóriu.
“Alokasaun orsamentu ministériu nian ba tinan oin millaun $15-resin, no orsamentu ba fronteira ne’e tau iha fundu infraestrutura, ba tinan ne’e tau millaun $2.5. Ami espera katak, tinan ida-ne’e bele ezekuta hotu, tanba ita atu reabilita de’it uma iha fronteira ne’e hamutuk 47. Ida-ne’e seidauk inklui eskuadra sira iha Dili ne’e sei hahú nia prosesu aprovizionamentu, depois mós kuartél munisipál Dili, Liquiça, Ermera, Aileu. Ba eskuadra tolu iha Dili hanesan Vera Crus, Na’in Feto ho Cristo Rei, eskuadra Lore, eskuadra Hatulia B, sei aumenta tan eskuadra Quelicai, Loes, nune’e tinan oin ita hahú halo konstrusaun ba sira,” Ministru Interiór, Francisco da Costa Guterres, hateten ba jornalista sira hafoin halo audiénsia públika ba proposta OJE 2025 husi ministériu nian ho komisaun B trata asuntu Negósiu Estranjeiru no Defeza ho Seguransa iha Parlamentu Nasionál (PN), segunda ne’e
Governante ne’e hateten, ba tinan oin kontinua foku garante seguransa estabilidade ba povu no nasaun ida-ne’e no konsolida seguransa no jestaun fronteira, ho fortalesimentu instituisionál.
Nia dehan, jestaun área fronteira importante tebes tanba tenke taka ho di’ak, hakarak seguransa proteje sidadaun fronteira tenke taka ho di’ak, tanba mundu ida agora ne’e krime la koñese ona fronteira nia autór bele nasaun seluk implementadór ne’e bele iha Timor-Leste.
“Agora importante mak ita tenke jere ita-nia fronteira ne’e, dala barak sira hakat liu no sira bele halo krime iha ita-nia rai. Tanba ne’e, foku Unidade Patrollamentu Fronteira (UPF) tinan ne’e ami hahú ona prosesu reabilitasaun ninia infraestrutura no ekipamentu hotu. Iha 2025, kontinua nafatin atu hadi’a di’ak liután,” nia dehan.
Aleinde ne’e, nia dehan, hamutuk ho komandu jerál PNTL tau ona kondisaun mínimu iha seidauk kompletu ba iha munisípiu, postu administrativu bele hala’o serbisu ona.
Durante audiénsia, MI aprezenta ninia progresu ezekusaun Orsamentu Jerál Estadu (OJE) 2024 husi montante millaun $16 ezekuta atinje ona 75%.
Enkuantu, tuir dokumentu livru proposta OJE 2025 Planu Asaun Anuál, Entidade Públiku Serbisu Administrativu, ba tinan oin MI prevee $15,000,336 hodi aloka ba saláriu vensimentu $12,276,037, bens no serbisu $2,158,319, kapitál menór $40,184, kapitál dezenvolvimentu $525,796.
Husi orsamentu ne’e finansia programa rua (2) mak hanesan programa seguransa nasionál ho sub-programa seguransa patrimóniu Estadu ho atividade haat (4), sub-programa prevensaun konflitu komunitária no konstrusaun pás ho atividade sia (9), sub-programa serbisu imigrasaun ho atividade haat (4), sub-programa seguransa rodaviáriu ho atividade haat (4).
Programa funsionamentu no dezenvolvimentu instituisionál ho sub-programa tolu (3) no atividade 15.
Enkuantu tuir livru proposta OJE 2025 ba fundu infraestrutura iha programa seguransa nasionál, haktuir katak fundu infraestrutura apoiu programa seguransa nasionál, prinsipalmente konstrusaun instalasaun ne’ebé kontribui efisíensia instituisaun seguransa nasionál iha ezekusaun tarefa ho objetivu ba kumprimentu misaun, programa ne’e kobre pontu sira vijilánsia fronteira, kuartél jerál polísia nasionál no munisípiu, estasaun polísia sira, iha totál projetu 123 ne’ebé mak lista programa ne’e inklui projetu 11 la’o hela no projetu foun 112, no ba tinan 2025 ninia orsamentu $1.665.708.
Jornalista : Nelson de Sousa
Editór : Cancio Ximenes

