COVALIMA, 29 outubru 2024 (TATOLI) – Diretór Servisu Saúde Munisipál Covalima, Domingos Sequiera husu ba Administradór postu Administrativu sira atu kontrola pesoál saúde ne’ebé presta servisu iha sentru saúde, iha postu administrativu sira.
Dirijente ne’e dehan, bazeia ba mapamentu Servisu munisipál saúde ida, sentru saúde komunitáriu hitu, postu saúde 24, klínika privadu rua, postu Sisca 15 no mobile klínika 22, iha postu hitu munisípiu Covalima.
“Ita-boot sira (autoridade) presiza kontrola pesoál saúde sira ne’ebé mak presta sira-nia servisu iha postu sira tanba administradór postu sira mak asina pesoál saúde sira-nia lista prezensa hodi aprezenta mai ha’u. Pesoál tama servisu la tuir oras la presiza asina sira-nia lista prezensa diáriu,” Domingos Sequiera informa, iha AMC ohin.
Autoridade postu, nia dehan, iha responsabilidade atu kontrola pesoál saúde sira ne’ebé servisu munisipál saúde Covalima destaka ba iha sentru saúde hitu no postu saude ne’ebé estabelese iha Covalima.
Bazeia ba baze legál artigu 57 hatete,ema hotu iha direitu ba saúde asiténsia médika sanitaria ,Diploma ministeriál konjunta númeru 6/2018, 21 Marsu órganika Servisu munisipál Saúde no dekretu-lei númeru 3/2016 artigu ualu, regulamentu husi diploma ministeriál konjunta númeru 6/2018 fó kompeténsia ba servisu saúde sira hodi promove promosaun no edukasaun iha servisu saúde hodi kontrola moras iha populasaun sira, nune’e atu alkansa implementasaun ne’ebe efetivu.
Servisu saúde Covalima implementa nia programa vijilánsia sanitária hanesan halo sensibilizasaun no avizu ba komunidade, halo teste bee iha fasilidade no komunidade, kontrola fatin prepara hahan iha loja sira, relata relatóriu ba nasionál ho tempu oras 24, semana no mensál no seluktan.
Tan ne’e, servisu saúde Covalima koloka pesoál saúde ba sentru saúde no postu saúde sira hamutuk pesoál saúde 289 kompostu husi médiku 26, parteira 49, enfermeiru 75, asisténsia enfermeiru 16 tékniku aliadu 31 saúde públika 54 no sira seluk ne’e 38.
Dadus pesoál saúde 289 kompostu husi funsionáriu permanente 182 no funsionáriu kontratadu 107 ne’ebé mak presta servisu iha saúde Covalima atu halo atendementu ba komunidade sira nune’e labele kontrola hotu.
iha Sorin seluk, Xefe Suku Fohorem, Júlio Ferreira Alves, rekomenda ba diretór servisu munisipál saúde atu kontrola pesoál saúde sira-nia servisu, presiza distribui oráriu servisu ba líder komunitáriu sira.
“Ita-boot sira presiza distribui oráriu servisu mai ami nune’e ami xefe suku bele iha koñesementu bainhira ita-boot sira hala’o programa saúde iha suku no Aldeia. Se bainhira ita–boot sira la fó oráriu oinsá mak ami bele kontrola servisu husi pesoál sira,” nia fó hanoin.
Jornalista: Celestina Teles
Editór:Rafael Ximenes de A . Belo
