Bolseiru 18 medisina sei kontinua estudu espesialidade iha Cuba tinan ne’e
DILI, 29 outubru 2024 (TATOLI)–Fundu Dezenvolvimentu Kapitál Umanu (FDCH, sigla portugés), Ministériu Saúde (MS), no Institutu Nasionál Administrasaun Públika (INAP) asina ona akordu hodi haruka bolseiru 18 medisina kontinua sira-nia estudu espesialidade iha Havana, Cuba.
“Ita haruka bolseiru espesialista na’in-18, sira-ne’e sei bá iha fulan-novembru tanba bazeia ba tinan letivu iha Cuba,” Diretór Ezekutivu FDCH, Júlio Aparício, informa ba Agência, iha ninia knaar fatin, tersa ne’e.
Bolseiru sira-ne’e sei hala’o estudu iha área espesialidade, interna, neurosirurjia, intensiva no emerjénsia, anjiolojia no sirurjia vaskulár, ortopedia no traumatolojia, urolojia, sirurjia kardiovasculár, patolojia anatomia, pediatria, anestisiolojia no reanimasaun, endrokrinolojia, obstetria ginekolojia, patolojia klínika no sirurjia rekonstrutiva no kaumatolojia.
“Ida-ne’e programa prioridade IX Governu nian ne’ebé aposta ba dezenvolvimentu rekursu umanu iha área espesializada sira iha setór saúde hodi kontribui ba melloria prestasaun servisu,” nia esplika.
Notísia relevante : FDCH tinan oin prioriza bolsa estudu ba espesialista iha área oin-oin
Bolseiru sira nia kustu vida kada fulan $1000, peskiza anuál $1.500, inklui subsídiu ba seguru saúde $225.
“Maibé ha’u foin simu fali karta husi Ministériu Saúde dehan kustu ne’ebé prevee ladún sufisiente nomós matéria didátiku sira-ne’e, entaun ha’u sei ba aprezenta Konsellu Administrasaun depois deside tan. Tanba ita mós sei haree progresu mudansa folin sasán iha ema-nia rai,” Júlio Aparício, katak.
Jornalista : Osória Marques
Editora : Julia Chatarina
