COVALIMA, 29 outubru 2024 (TATOLI) – Polísia Nasionál Timor-Leste (PNTL), Covalima, seidauk hatene motivu husi labarik matebian ho naran Jenila Selomitha Jordão Gusmão ho Jiovanio Jordão Gusmão hakotu iis, iha aldeia Sukabilan, Suku Suai loro, postu Suai, Munisípiu Covalima.
Komandante PNTL Covalima, Superintendente Polísia Calisto Gonzaga informa, PNTL simu informasaun iha kalan 12:00, hafoin simu informasaun nia parte orienta ba investigasaun ba iha terenu hodi hasai matebian na’in-rua iha uma-laran evakua mai iha ospitál atu médiku halo ezaminsaun labarik na’in-rua nia mate isin.
“Ita presiza autopsia hodi bele hatene motivu husi insidente ne’e akontese, tanba natureza ka mosu krime sira seluk , nune’e atu deskobre motivu husi kazu maibé presiza tempu hodi reforsa prosesu investigasaun,” Calisto Gonzaga dehan, iha Santa-Rosa ohin.
Matebian na’in rua ne’ebé hakotu iis ho naran Jenila Selomitha Jordão Gusmão ho idade hitu ho Jiovanio Jordão Gusmão ho idade neen hakotu iis iha loron 28 outubru ne’e.
Komandu nafatin sei halo investigasaun, tanba bazeia ba informasaun ne’ebé simu matebian na’in-rua foti iha bee tanke-laran, maibé PNTL esforsu hodi halibur dadus atu bele deskrobe motivu husi insidente referida.
“Hori kalan família la autoriza atu halo autopsia, maibé ita Estadu direitu demokrátiku, ita hakarak deskobre motive husi insidente presiza liuhosi autopsia nune’e reforsa prosesu atu foti solusaun nune’e bele relata mós ba ministériu públiku,” nia dehan.
Parte investigasuan presiza halo autopsia tanba iha tereñu matebian labarik na’in-rua motu iha bee-laran maibé informasaun ne’e la razoavel tanba labarik na’in-rua toba de’it iha bee-laran presiza halo investigasaun
Médiku Emerjénsia, Augusto Adelaide Pereira esplika, iha sala emerjénsia médiku sira halo uluk atendementu ba matebian nia inan ho naran, Vitorina Sergio Guterres nia kanek iha parte kakorok naruk ho sentimu rua nia ulun sorin bubu halo ran sai.
“Ami simu matebian na’in rua nian iha sala emerjénsia ami halo tratamentu nune’e haree ba matebian na’in nia inan kondisaun di’ak dadaun iha hela sala ICU ospitál Suai”. nia relata.
Hafoin médiku halo atendementu ba matebian nia inan, médiku mós halo atendementu ba matebian labarik na’in-rua ne’ebé lori mai ospitál la’os mai iha sala emerjensia maibe ba direta iha sala mortuariu.
“Ha’u simu kazu 12h00 matebian labarik na’in rua la lori mai iha sala emerjénsia lori ba liu iha sala mortuáriu ha’u konsege haree matebian na’in rua iha sala mortuáriu kondisaun ho isin bokon, isin sira metan no kabun bubu no la deteta sinál kanek ruma iha matebian na’in-rua nia isin loron”. nia dehan.
Jornalista: Celestina Teles
Editór: Rafael Ximenes de A. Beki
