Autopsia la’o ho di’ak HNGV entrega ona matebian na’in-rua ba família
DILI, 30 outubru 2024 (TATOLI) – Xefe Departamentu Forensik iha Hospitál Nasional Guido Valadares (HNGV), Nilton Tilman hateten ospitál entrega ona matebian na’in-rua ho naran Jenila Selomitha Jordão Gusmão no Jiovanio Jordão Gusmão ba nia família.
“Matebian na’in-rua ne’e mai husi Covalima to’o iha horseik lokraik no ita hein mandadu husi tribunál ohin meudia ita halo autopsia ba matebian na’in -rua hotu ona, buat hotu lao ho di’ak no ita entrega ba família atu tuir prosesu funebre”, Nilton Tilman informa ba TATOLI, ohin.
Nilton esplika, rezultadu Forensik HNGV, atualmente, prepara hela hodi entrega ba Ministériu Públiku hafoin bele fó sai.
“Rezultadu agora daudaun ami prepara hela semana ida ka rua ita boot sira bele ba konfirma tribunal atu bele fó sai ona rezultadu”, nia adianta.
Nia dehan, autopsia lao ho di’ak maibé kona-ba kauzahusi akontesimentu ne’e tribunál mak bele loke, apezarde informasaun ne’ebé mak espalla katak iha tentativu omisídiu husi nia inan ba sira na’in-rua tanba inan ho aman iha problema uma laran ne’ebé inan deskotroladu hodi komete tiha hahalok ida-ne’e.
“Inan buti tiha nia oan na’in rua ne’e mak soe tama ba bee possu laran, entaun kazu ne’e tama ona ba espasu legál nian, nune’e mak tribunal hasai mandadu ka ordem hodi halo autopsia ba matebian na’in-rua ne’e.
Matebian na’in-rua ne’e ho naran Jenila Selomitha Jordão Gusmão no Jiovanio Jordão Gusmão ba nia família husi Aldeia Sukabilan, Suku Suai Loro, Postu Administrativu Suai, Munisípiu Covalima.
Jornalista : Felicidade Ximenes
Editór : Zezito Silva
