Autoridade Viqueque hahú halo preparasaun ba komemorasaun loron 28 Novembru
VIQUEQUE, 30 outubru 2024 (TATOLI)-Autoridade munisípiu Viqueque, kuarta ne’e, hahú koordena malu hodi hala’o preparasaun ba komemorasaun loron proklamasaun independénsia ba dala-49 iha loron 28 Novembru.
Prezidente Autoridade munisípiu Viqueque, Francisco Cruz S. de Gonzaga Soares, hateten, autoridade hamutuk ho estrutura komisaun ba prepreparasaun selebrasaun loron 28 Novembru kompleta estrutura hodi halo preparasaun.
“Ohin, ami kontinua enkontru ba preparasaun dalaruak nian atu kompleta estrutura komisaun organizadór nian hodi halo preparasaun ba atividade sira-ne’ebé maka atu realiza iha loron istóriku referida”, Francisco Cruz S. de Gonzaga Soares, hateten iha salaub administrasaun munisípiu Viqueque, ohin.
PAM Viqueque ne’e dehan, despois kompleta estrutura hotu komisaun sira sei halo preparasaun hodi trasa programa ba selebrasaun komemorasaun nian.
“Tanba ne’e, ita hahú prepara uluk komisaun lai. Kona-ba orsamentu ba komemorasaun nian ita seidauk koloka, ita hein komisaun sira trasa tiha planu no programa maka sira aprezenta proposta orsamentu ba atividade komemorasaun nian. Ne’ebé daudaun ne’e ita seidauk prevee orsamentu ba komemorsaun nian”, nia afirma.
Iha fatin hanesan, Prezidente Komisaun Organizadóra ba komemorasaun 28 Novembru, Acacio de Sousa, haktuir, komisaun organizadora ba selebrasaun loron 28 Novembru ba tinan ida-ne’e kompostu husi Diretór munisipál, veteranuno FALINTIL-Forsa Defeza Timor Leste (F-FDTL) hodi selebra loron proklamsaun independénsia.
“Ba atividade komemorasaun ne’e sei realiza atividade parada militár, iha mós eventu expo husi F-FDTL, serimónia kondekora medalla ba kombatente libertasaun munisípiu Viqueque, misa agradesimentu no entrega monumentu levantamentu 1983 iha Buanurak ba Estadu.
Enkuantu Korpu Isar badeira ne’e sei responsavél husi estudante Sekundáriu 4 setembru munisípiu Viqueque, korru responsavél husi estudante Sekundáriu Santu Estevão Viqueque no eskola Kafé.
Tuir horariu serimónia kondekorasaun ba kombatente livertasaun sei realiza iha Buanurak no isar bandeira nivel munisípiu iha kampu futeból postu Viqueque Vila.
Jornalista : Vitorino Lopes da Costa
Editór : Florencio Miranda Ximenes
