DILI, 30 outubru 2024 (TATOLI)–Peskizadora Organizasaun Naun Governamental Lao Hamutuk, Elizaria Febe Gomes, hateten impréstimu fó risku tusan ba jerasaun vindoura ka jestaun tuir mai tanba iha tusan ne’ebé boot.
“Ami sujere atu PN ezije Governu fornese informasaun realistíku kona-ba motivu husi planu empréstimu boot ne’e, atu la lori impaktu boot ba jerasaun sira tuir mai, oinsá mak nasaun ne’e bele selu fali bainhira ita laiha ona osan husi Fundu petroliferu,” Peskizadora Elizaria Febe Gomes hateten liuhusi Konferénsia imprensa iha Bebora.
Nia esplika, maske Governu hahú ho intensaun di’ak sira hodi halo redusaun ba empréstimu sira iha setór saúde no edukasaun, realidade iha proposta lei OJE 2025, artigu 5 nafatin kontinua promove empréstimu atu dezenvolve setór indústria mina no gás.
Iha tinan ida-ne’e, nia dehan, Governu propoin bareira ba empréstimu iha kontratu foun ho tokon $850.
Iha proposta OJE 2025 nian hatudu total empréstimu tokon $1,024 ne’ebé kontratu ona no foin dezembolsu tokon $259 iha 2023 nia rohan. Iha tinan 2025 Governu sei selu tusan hamutuk tokon $26, atu sa’e ba tokon $40 iha tinan 2028-2029, maske empréstimu hirak ne’e define períodu grasa no tempu ba selu fali to’o tinan 2062.
Tuir Lao Hamutuk, empréstimu ohin loron karik seidauk sai preokupasaun ba Governu, maibé haree ba bareira empréstimu foun ho montante boot ne’ebé propoin husi Governu, presiza sai kestaun boot ba deputadu sira atu kestiona nia motivu husi tusan hirak ne’e.
“Ami sujere ba PN atu husu klarifikasaun ba Governu kona-ba motivu husi tetu empréstimu nian ne’ebé boot tebes. Maske iha redusaun ba empréstimu setór esensiál, tendénsia empréstimu boot sei finansia ba setór estrativa no presiza klarifikasaun kle’an husi Governu ba kapasidade Estadu nian atu reembolsu fali tusan sira-ne’e bainhira ita laiha ona Fundu Petroliferu,” nia dehan.
Jornalista : Jesuína Xavier
Editór : Cancio Ximenes
