Tailándia apoiu sasan esensiál ba Fundasaun Alola
DILI, 30 outubru 2024 (TATOLI) – Embaixada Real Tailándia apoiu sasan esensiál ba inan feton ho labarik sira ne’ebé iha Casa Vida no Fundasaun Alola nian. Atividade voluntáriu ida-ne’e hodi komemora loron memorial Sua Majestade Liurai boot Bhumibol Adulyadej no Sua Majestade Liurai Chulalongkorn.
“Ita organiza atividade voluntáriu hodi komemora Loron Memorial Sua Majestade Liurai Boot Bhumibol Adulyadej iha loron 13 fulan-Outubru tinan 2024 no Loron Memorial Sua Majestade Liurai Chulalongkorn loron 23 fulan-Outubru tinan 2024, hodi fó doasaun sasan esensiál ba inan feton ho labarik sira iha Casa Vida no Fundasaun Alola, nu’udar organizasaun sosiadade sivil timornian ne’ebé fó protesaun, restaurasaun no empoderamentu ba feto foinsae no labarik sira vítima hosi violénsia bazeia ba Jéneru”, Embaixadór Tailándia iha Timor-Leste, Atipat Rojanapaibulya dehan iha salaun Fundasaun Alola, ohin.
Embaixadór afirma, Embaixada Tailándia servisu hamutuk ho Fundasaun Alola durante tinan 10-resin no agora apoiu tan sasan esensiál ba inan feton ho labarik sira iha Casa Vida no Fundasaun Alola.
Iha fatin hanesan, Diretora Ezekutiva Fundasaun Alola, Maria Imaculada Guterres, dehan Embaixada Tailándia fó apoiu sasan esensiál hanesan mina, mantega, rinso, sabaun, Pepsodent, dose no seluk tan.
“Ami atende ba vítima violénsia bazeia ba jéneru sira, liuliu ba feto sira tanba sira mós mai persiza loos sasan esensiál sira hanesan ne’e, entaun ida-ne’e apoiu ami hodi fahe sasan sira nee ba sira,” Imaculada Informa.
Jornalista : Felicidade Ximenes
Editór : Zezito Silva
