DILI, 04 novembru 2024 (TATOLI)—Deputada husi bankada FRETILIN, Nurima Ribeiro Alkatiri, husu Estadu atu urjentemente luta kontra hodi redús violénsia hasoru feto ho forma oioin iha Timor-Leste (TL) no husu Governu atu tau prioridade iha alokasaun orsamentu hodi kontinua promove programa igualdade jéneru.
“Iha kada 03 novembru, TL komemora loron nasionál feto, hanoin Komemorasaun loron nasionál feto iha kada 03 novembru nu’udar loron importante tebes la’ós feto Timor de’it maibé ba timoroan hotu-hotu. Tanba, hanesan marka luta husi maluk feto sira-ne’ebé kontribui mós ba ita-nia ukun aan hahú husi Maria Tapo, Rosa Muki Bonaparte, Soimali no seluk tan,” Deputada Nurima Ribeiro hateten ba Agência TATOLI iha resintu PN, kuarta (30 outubru 2024) ne’e.
Nia hateten, komemorasaun ne’e mós hanesan loron reflesaun ba timoroan hotu liuliu ba jerasaun foun sira atu hanoin saida mak bele halo, hodi kontinua kontribui dezenvolve Timor-Leste, atu garante katak maluk feto sira bele iha tan oportunidade barak liután hola parte iha prosesu dezenvolvimentu iha vida sosiál, ekonómika no polítika iha TL.
Nune’e, loron importante ne’e tenke hanoin pasu saida mak timoroan presiza hakat ba oin, tanba sei iha buat barak presiza halo atu garante katak iha igualidade iha Timor-Leste, Estadu tenke halo buat barak liuliu igualidade ne’e prioridade maibé iha prátika la haree implementasaun orsamentu ne’e sei ladun koresponde.
“Ita haree de’it ba alokasaun orsamentu de’it husi Sekretária Estadu Igualidade (SEI) ba programa sira relasiona ho igualidade jéneru menus tan de’it. Ida-ne’e preokupasaun boot, tanba signifika Estadu rasik la fó prioridade ba maluk feto sira atu hetan oportunidade no atu hetan igualidade iha ita-nia sosiedade,” nia dehan.
Membru husi órgaun lejislativa ne’e, hato’o mós iha seluk atu halo mós presiza investe iha edukasaun hodi garante maluk feto sira mós sei iha nafatin bele iha asesu barak liután ba edukasaun iha nível hotu-hotu, no labele de’it edukasaun primária no sekundária atu bele partisipa mós iha vida profisionál.
Iha área emprendedorizmu mós feto foinsa’e barak ne’ebé koko no iha inisiativa atu hahú sira-nia negósiu ki’ik rasik, ida-ne’e mós Governu bele haree saida mak nesesáriu la’ós investimentu orsamentu de’it maibé mós formasaun no apoiu atu sira bele sai forte liután.
Deputada membru komisaun F trata asuntu Saúde, Seguransa Sosiál no Igualidade Jéneru iha PN ne’e, hato’o populasaun feto kuaze metade husi populasaun Timor-Leste presiza tau atensaun boot liu ba saúde materna infantil no ba saúde feto nian, atu garante katak Timor-Leste nia sistema saúde ne’e sei bele redús mortalidade feto nian no infantil no bele fó atensaun boot liután ba feto sira-ne’ebé vulnerável presiza serbisu saúde.
Aleinde ne’e, nia dehan, urjente loos atu tau atensaun mós luta kontra husi Estadu tomak ba violénsia kontra feto ne’ebé aas tan de’it, hanesan violénsia doméstika no abuzu seksuál.
“Ita importante loos ba ita-nia rai mak violénsia kontra feto ne’ebé aas tan de’it, violénsia no abuzu seksuál, ida-ne’e mak presiza atensaun urjente husi Estadu tomak, Governu, Parlamentu, Prezidente Repúblika no Tribunál mós. Atu ita garante katak, lei violénsia doméstika ne’e implementa ho loloos maibé mós atu eduka ita-nia sosiedade atu hasaes aan husi violénsia atu moris dook husi violénsia,” nia dehan.
Iha ámbitu komemorasaun loron nasionál feto, Deputada Nurima nafatin enkoraja ba maluk feto timoroan hotu atu fiar aan nafatin no apoiu malu, labele ema ida-idak hanoin halo mesak maibé kria liña networking ne’ebé sei fó apoiu ba malu husi família no husi maluk feto sira seluk no maluk mane sira atu ita avansa ba oin buras liután.
Deputada CNRT, Bendita Monis Magno, enkoraja maluk feto sira seluk iha TL ho komemorasaun loron ne’e atu partisipa ativu liután iha prosesu dezenvolvimentu nasaun.
“Espera ho komemorasaun loron nasionál ne’e feto sira mós bele dezenvolve sira-nia aan iha área ekonomia, agrikultura ba saida de’it mak feto bele halo hanesan bele halo serbisu iha uma laran no li’ur fiar katak feto bele prontu serbí rai ida-ne’e,” nia dehan.
Jornalista : Nelson de Sousa
Editór : Cancio Ximenes
