COVALIMA, 04 Novembru 2024 (TATOLI) – Servisu Munisipál Administrasaun Rekursu umanu (SMARU) simu ona dokumentu husi kandidatu na’in-490 ne’ebé konkorre ba vaga ajente administrasaun públika iha autoridade munisipál Covalima.
Diretór Munisipál Administrasaun no Rekursu Umanu, José Manuel Gonçalves, dehan autoridade Covalima anunsiu konkursu públiku ba vaga ajente administrasaun públika, bazeia ba despaixu númeru 13862/2024/CFP.
“Dadaun ne’e prosesu selesaun dokumentu la’o hela, hein semana rua tan ita publika nia rezultadu selesaun dokumentu ba kandidatu ne’ebé konkorre vaga ba ajente administrasaun públika”, José Gonçalves informa.
kandidatu sira ne’e konkorre ba vaga ba pozisaun sira hanesan enjeñeiru sivíl grau C na’in-neen, enjeñeiru arkitetura grau C neen, ofisiál finansa grau C neen, tékniku apoiu servisu finansa munisipál grau D 16 no apoiu administrasaun jerál grau E 17.
SMARU Covalima loke vaga ne’e hanesan parte ida halo preparasaun relasiona ho Prezidente Repúblika (PR) promulga ona Lei Reforma Obrigatória ba funsionáriu públiku no ajente sira ho idade 65 hodi priexe sira-nia fatin.
Kandidatu sira ne’ebé konkorre vaga no bainhira pasa iha teste ne’e sei hala’o kna’ar iha Servisu Munisipál Finansa, Servisu Munisipál Administrasaun no Rekursu Umanu, Servisu Munisipál Planu Integradu no Dezenvolvimentu, Servisu Munisipál Obra Públika, Servisu Munisipál Asaun Sosiál no sei koloka bá to’o iha administrasaun postu hitu iha Covalima.
Dadus funsionáriu Públiku ne’ebé presta serbisu ho rejime jerál hamutuk 321, funsionáriu rejime espesiál 21, ajente administrasaun 44 no funsionáriu kazoál 211 no funsionáriu ne’ebé rejista ba reforma obrigatória hamutuk 34.
Jornalista: Celestina Teles
Editora: Maria Auxiliadora
