OÉ-CUSSE, 04 Novembru 2024 (TATOLI) – Komersiante sira iha merkadu tradisionál Numbei, ne’ebé lokaliza iha aldeia Sanane, suku Costa, Rejiaun Administrativa Espesiál Oé-Cusse Ambeno (RAEOA) preokupa ho problema falta bee-moos.
Tanba ne’e, xefe suku Costa, Francisco Colo, husu ba Servisu Água no Saneamentu (SAS) atu tau atensaun, tanba bee ne’e dalaruma to’o fulan mak foin sai dala-ida.
“Merkadu Numbei agora hasoru problema ba bee-moos, tanba komunidade sira la asesu ona bee besik fulan ida. Tan ne’e, ha’u rekomenda ba Governu, liuliu SAS atu haree ba bee-moos ne’e, kuandu iha ekipamentu mak falla persiza buka meiu atu hetan nia solusaun”, Francisco Colo hateten ohin.
Notísia relevante: SAS Oé-Cusse instala bee-moos ba komersiante merkadu Numbei
Líder komunitáriu ne’e lembra katak, iha 2021, autoridade RAEOA halo perfurasaun ba sistema bee-moos ida iha Numbei, maibé labele konsumu tanba bee-masin.
“Perfurasaun bee-moos ne’e ha’u observa hela, uluk Governu gasta osan, maibé nia vantajen laiha liu to’o agora, tanba bee ne’e masin, entaun komunidade sira labele konsumu, depois bee ne’e dalaruma la sai”, nia lamenta.
Kona-ba problema falta bee-moos, Jestór Merkadu Numbei, Fernando de Sousa Neka, informa katak bee iha merkadu dalaruma fulan ida-resin mak foin sai, maibé ho durasaun tempu minutu 20 de’it.
“Entaun, ami tenke bá buka fali bee iha fatin seluk. Momentu 2021, Governu halo perfurasaun ida maibé bee la sai, dalaruma sai, maibé ami labele hemu tanba bee-masin. Durante ne’e ami asesu bee husi Samoro no Oétulu nian, maibé kle’ur mak sai to’o semana dalaruma fulan”, nia informa.
Hatán ba preokupasaun sira-ne’e, Xefe Departamentu SAS Oé-Cusse, José Ili, rekoñese katak projetu perfurasaun bee-mos ne’ebé autoridade anteriór halo iha bairru Numbei ne’e bee-masin tanba besik lagoa, maibé SAS kontinua distribui gratuitamente ba komunidade liuhusi karreta tanke.
“Durante ne’e, ami apoia ho karreta tanke, nomós bee husi sistema gravitasaun Oétulu iha kada semana, daudaun bee komesa menus. Foin daudaun ami hadi’a tan mákina bomba bee foun iha Panite, maibé parte EDTL seidauk monta trafo, tan ne’e mak labele fornese to’o merkadu Numbei. Espera iha tempu badak ita bele solusiona”, nia garante.
Notísia relevante: SAS Oé-Cusse instala bee-moos iha fatin lima ho millaun $1-resin
Rekorde katak, iha 2021, autoridade RAEOA halo perfurasaun ba sistema bee-moos ida iha bairru Numbei no ezekuta husi emreza Colo Unipessoal Lda ho valór osan $63.072,30, ne’ebé autoridade RAEOA prevee husi Fundu Covid-19.
Jornalista: Abílio Elo Nini
Editora: Maria Auxiliadora
