DILI, 04 novembru 2024 (TATOLI)—Segundu Sekretária Meza Parlamentu Nasionál (PN), Bendita Monis Magno, felisita feto Timor-Leste (TL) tomak iha ámbitu komemorasaun loron nasionál feto ne’ebé Timor-Leste komemora kada 03 novembru 2024.
“Nu’udar feto iha Parlamentu Nasionál, tanba husi feto mak ohin loron ami reprezenta feto iha PN tuir lei eleitorál. Ha’u fó nafatin kongratulasaun no parabéns hakuak boot ba feto sira hotu,” Segundu Sekretária Meza PN, Bendita Monis Magno, hateten ba Agência TATOLI iha resintu PN, kuarta (30 outubru 2024) ne’e.
Membru husi órgaun lejislativa ne’e dezeja feto Timor-Leste hotu atu partisipa ativa iha prosesu dezenvolvimentu nasaun iha aspeitu oioin, liuliu atu bele hola parte iha eleisaun asembleia munisipál mai.
“Dezeja katak, feto hotu-hotu hamriik iha sira-nia ain leten no buka atu avansa ba oin. Espera feto hotu-hotu tenke kompete ba iha eleisaun asembleia munisipál tuir mai, tenke korajen, brani no forsa atu bele hasoru eleisaun asembleia munisipál tuir mai iha ida-idak nia munisípiu,” nia dehan.
Nune’e, feto ida-idak halo konsolidasaun no kampaña ba iha feto maluk sira no mós la’ós feto maluk de’it maibé ba feto mesak labele, tenke husu nafatin apoiu husi mane sira, hodi iha komemorasaun loron nasionál ida-ne’e sai mós atu bele motiva bele sira bele avansa ba oin.
Nia espera, ho komemorasaun loron nasionál ne’e feto sira mós bele dezenvolve sira-nia aan iha área ekonomia, agrikultura ba saida de’it mak feto bele halo hanesan bele halo serbisu iha uma laran no liur fiar katak, feto bele prontu serbí rai ida-ne’e.
Deputada husi bankada CNRT ne’e rekomenda ba Governu liuhusi Sekretária Estadu Igualidade (SEI) atu tau nafatin atensaun ka prioridade ba feto sira atu bele hetan kna’ar iha mós instituisaun Estadu no Governu no fiar liután labele dehan mane mak barak liu, no oinsá hasa’e kuota feto sai membru Governu.
“Ita bele halo mós hanesan ho Parlamentu mane rua (2) no feto ida (1) tenke iha mós Governu, ida ne’e mak importante. Tanba Governu ba feto mós seidauk to’o 10%, Parlamentu iha 38%, espera katak mane sira bele fó mós oportunidade ba feto sira, aumenta kuota feto sira iha Governu,” nia dehan.
Jornalista : Nelson de Sousa
Editór : Cancio Ximenes
