DILI, 04 novembru 2024 (TATOLI)–Prezidente Conselho Nasionál Juventude Timor-Leste (CNJ-TL), Maria Dadi Magno, hateten persentajen feto di’ak iha vida polítika liuliu hanesan membru Parlamentu Nsionál iha uma fukun Parlamentu Nasionál.
Maria Dadi Soares Magno hato’o asuntu ne’e nakait ho loron nasinál feto ba dala 48 ne’ebé selebra iha loron 03 novembru ho tema “Feto iha dezenvolvimentu depois tinan 25 konsulta populár”.
“Ha’u hanoin Estadu rekoñese papél feto nia kontribuisaun hanesan juventude iha prosesu luta libertasaun nasionál da pátria. Ita komemora ona loron nasionál feto, maibé feto barak ladún sente, ita ne’ebé hanesan feto no inan. Ita liga partisipasaun iha kotestu polítika, ha’u hanoin aas tebes hanesan partisipasaun feto iha membru Parlamentu Nasionál iha Sudeste Aziatiku iha nível polítika. Maske persentajen feto iha suku kiik,” Prezidente Conselho Nasionál Juventude Timor-Leste (CNJ-TL), Maria Dadi Magno ba Agência Tatoli, iha Faról.
Nia hanoin hikas fali partisipasaun feto iha lideransa lokál iha redusaun iha eleisaun tinan ikus ne’e, maibé partisipasaun iha kompetisaun kandidatura aprezenta númeru di’ak.
“Husi 21% tun ba 18% iha lideransa suku, maibé partisipasaun iha eleisaun boot, maibé la eleitu. Haree husi kandidatura ba xefe suku, ha’u apresia absoluta feto iha partisipasaun iha vida polítika,” nia dehan.
Tuir nia, feto sira mós agora komesa kompreende kestaun igualdade jéneru oinsá atu partisipa iha aspetu oioin iha área rurál no hatene sira-nia papel.
“Iha feto barak mós asume kargu xefe departamentu no diretora no setór privadu no públiku, maibé menus mak membru postura iha Governu agora,” nia dehan.
Tanba ne’e, nia sujere ba Governu katak feto tenke investe nia aan, estuda nafatin liuhusi esperiénsia oioin, ativu no krítiku tanba ida-ne’e mak importante.
Nia dehan, Estadu tenke investe iha polítika hodi fó espasu feto hotu iha vida polítika, liuliu iha vida ekonomia.
Jornalista : Jesuína Xavier
Editór : Cancio Ximenes
