DILI, 04 novembru 2024 (TATOLI) – Diretór Servisu Saúde Munisípiu Dili, Mateus Pinto, hateten udan monu-rai komunidade sira tenke kontribui ba limpeza iha kada bairo hodi prevene moras dengue.
“Ami-nia sensibilizasaun la’o nafatin ba kada bairo sira hodi eduka komunidade sira oinsá moris saudavel, sira tenke hatene tanba dalabarak komunidade sira ladún preokupa kona-ba limpeza, entaun husi sensibilizasaun ida-ne’e atu husu komunidade tenke kontribui hamoos ambiente nune’e hadook husi moras sira”, Mateus Pinto dehan iha nia kna’ar fatin SSMD, bairo Formoza, ohin.
Nia hateten, udan monu-rai presiza komunidade nia konsiénsia atu hamoos uma nini, bee tanke no vazu ai-funan sira atu susuk labele moris ba hodi fó moras ba ema.
“Importante mak ambiente iha uma sorin, uma hun sira ne’e moos, atu susuk labele moris, ba ida -ne’e tenke toma atensaun, tanba ne’e besik udan monu, rai ita halo kedas fomigasaun nune’e prevene, tanba ita-nia komunidade iha Dili barak mak hakiak susuk iha roda, entaun roda ne’ebé mak iha, la uza karik soe ka sunu, se hakarak uza entaun taka nune’e bee labele nalihun iha laran”, nia konklui.
Nia esplika, kazu dengue ne’ebé mak durante ne’e aas iha Munisípiu Dili ne’e, maioria postu administrativu Dom Aleixo, tanba iha ne’eba komunidade barak, tuir mak Cristo Rei, Vera Kruz no Nain feto.
Nia afirma, ai-moruk abate no fomigasaun sufisiente iha Servisu Saúde Munisípiu Dili atu atende ba kazu dengue ne’ebé mak iha.
Husi janeiru to’o outubru, Servisu Saúde Munisípiu Dili rejista kazu dengue hamutuk 700-resin ne’ebé afeta ba labarik ho idade tinan lima to’o 15 no na’in ida mak lakon vida.
Joranlista : Felicidade Ximenes
Editór : Zezito Silva
