DILI, 04 novembru 2024 (TATOLI)–Xefe Departamentu Servisu Saneamentu iha Autoridade Munisipal Dili (AMD), Domingos dos Santos Soriano, hateten demanda konsumu sasán barak iha loron boot hanesan finadu aumenta volume lixu iha kapitál Dili.
“Iha loron 01 novembru, ekipa saneamentu la konsege rekolla lixu, iha loron 02 novembru ne’e la rekolla lixu no iha loron 03 novembru ne’e iha pesoál saneamentu balun de’it mak hala’o kna’ar, tanba ne’e foer aumenta makaas,” xefe departamentu, Domingos dos Santos Soriano, hato’o, ba Tatoli, ohin.
Maibé. nia dehan, daudaun ne’e pesoál saneamentu Autoridade Munisípiu Dili (AMD) no pesoál empreza ne’ebé Governu kontrata atu rekolla lixu sira-ne’e, hahú ona rekolla lixu sira-ne’e iha bairru sira atu bele redús lixu.
Tuir nia, kada tinan sempre akontese hanesan ne’e tanba bainhira hahú ona husi fulan-novembru to’o fulan-marsu ne’e, kuaze lixu iha Díli laran ne’e aumenta.
“Demanda negósiu konsumu no negosiu aumenta iha loron boot no loron feriadu sira, konserteza volume lixu aumenta makaas,” nia dehan.
Daudaun ne’e, AMD iha karreta modernu rekolla lixu nian ne’e hamutuk hitu (7) no iha mós ekipa rekolla lixu husi empreza hamutuk na’in-50 ne’ebé raut lixu loro-loron iha kapitál Dili.
Jornalista : Jesuína Xavier
Editór : Cancio Ximenes
