DILI, 04 novembru 2024 (TATOLI)—Xefe suku Bairru Pite, Joaninha Alves, hateten feto timoroan kontribui ona ba iha dezenvolvimentu nasionál iha setor oioin maibé husu Governu kontinua investe iha setór edukasaun.
Nia hateten, iha artigu 16 Konstituisaun Repúblika Demokrática Timor-Leste prevee ona feto no mané iha direitu no obrigassun hanesan iha dominiu hotu-hotu iha vida familiár, kulturál, sosiál, ekonomia no polítika.
“Ba ha’u feto iha Timor-Leste iha mudansa boot. Governu Timor-Leste adota konstituisaun Repúblika Demokrática Timor-Leste ne’ebé foka liu ba feto, nune’e mós luta feto nia direitu iha aspetu hotu. Tanba ne’e, ha’u haree iha tinan 25, Governu kria ona Organizasaun feto no fó oportunidade ba feto sira atu bele kontribui iha dezenvolvimentu iha aspetu saúde, edukasaun, sosiál no ekonomia ba dezenvolvimentu,” nia hateten ba Agência TATOLI, relasiona ho loron nasionál feto ho tema “Feto iha dezenvolvimentu nasionál depois tinan 25 loron konsulta populár” iha 03 novembru, iha domingu (03 novembru 2024) ne’e.
Timor-Leste iha mudansa boot iha Timor-Leste, maibé Governu da-sia (IX) presiza tebes halo mak kontinua halo kapasitasaun ba feto sira iha edukasun, tanba dezenvolvimentu nasionál presiza iha abilidade no kapasidade, tanba ne’e mak Governu fó oportunidade no investe iha feto.
Nia esplika, sistema kulturál timoroan kontinua foka ba iha sistema patriarkál, entaun fó oportunidade menus feto nian iha edukasaun.
Tanba ne’e, Estadu tenke fó oportunidade ba feto hodi kontinua estudu liuliu iha setór edukasaun kontinua minimu ba feto timoroan.
Ezemplu, nia dehan, Maria Tapo kontribui ba luta libertasaun nasionál, se nia moris karik sei asumi kargu ruma hanesan Primeira-Ministra, muda mentalidade mané sira-nian ho lais katak feto bele kontribui ba dezenvolvimentu nasionál.
“Se Governu investe nafatin feto iha edukasaun, Timor-Leste sei atinje meta igualdade jéneru iha família no iha sosiedade iha tinan lima sira mai. Tan ne’e, husu ba Governu investe iha edukasaun iha área formál no Naun formál,” nia dehan.
Jornalista : Jesuína Xavier
Editór : Cancio Ximenes
