VIQUEQUE, 05 outubru 2024 (TATOLI)-Komandante Autoridade Protesaun Sívil (APC, sigla portugés), iha Munisípiu Viqueque,Cirilio Soares Gomes, informa, hahú husi fulan Janeiru to’o fulan Outubru rejista uma-kain 163 mak afetadu dezastre naturál.
“Husi fulan Janeiru to’o agora, ami rejista ona uma-kain 163, família afetadu sira-ne’e ami apoia ona pakote emerjénsia ba sira. Husi númeru tipu dezastre hanesan rai halai, ahi-han uma no bee sa’e ka inundasaun hodi afeta ba ita-n lia komunidade sira-nia uma ne’ebé sira hela ba. Ami mós rejista ema mate bee lori ne’ebé foin lalais akontese iha postu Uatucarbau”, Cirilio Soares Gomes, hateten ba jornalista sira, iha ninia kna’ar fatin, Beloi, tersa ohin.
Cirilio relata, husi uma-kain 163 ne’ebé afetadu, fahe ba kategória rua uma-kain 151 mak sei hetan materiál rekuperasaun no uma-ka’in hamutuk 12 hetan pakote emerjénsia tanba la’ós uma hela, maibé uma dapur. Tan ne’e, maka sira labele hetan rekuperasaun.
“Ami haree de’it komunidade sira nian hela fatin hanesan uma, maibé hanesan dapur kioske sira-ne’e ita labele fó apoiu materiál konstrusaun. Ba uma-kain hamutuk 151 ne’ebé atu hetan rekuperasaun ne’e ami fahe ba kategória tolu uma aat totál hamutuk 58, aat naton 25 no aat kamaan 68. Husi dadús afetadu ba rekuperasaun ami aprova ona dokumentu no aprezenta ona ba APC nasionál hodi foti desizaun”, nia relata.
Materiál rekuperasaun ne’ebé APC atu apoia ba vítima afetadu sira kompostu husi kalen, besi beton, semente, pregu ai, pregu kalen no fiu kesi besi no orsamentu.
Orsamentu maun obra no orsamentu operasionál bázeia ba grau kategória tolu hanesan aat totál osan $1,000.00, aat naton $700 no aat kaman $6,00.
“Ha’u espera materiál rekuperasaun ba vítima afetadu sira-ne’e bele akonese iha 2025, maibé depende ba aprovasaun Orsamentu Jerál Estadu (OJE). Dala ruma liu, depende ita-nia orsamentu ne’ebé ita halo ba”, nia afirma.
Jornalista : Vitorino Lopes da Costa
Editór : Florencio Miranda Ximenes
