OÉ-CUSSE, 05 Novembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), inaugura, ohin, Ensinu Pré-Eskolár (EPE) Letemafo Nunuheno ne’ebé lokaliza iha aldeia Noeninen, iha suku Cunha, no EPE Oétulu iha aldeia Sanane, suku Costa, iha sub-rejiaun Pante Makasar.
Diretór Edukasaun Oé-Cusse, Vincencio Cono, dehan edifisíu foun rua ne’e nu’udar investimentu edukativu hodi hakbesik ba komunidade iha nivel aldeia no suku atu tulun labarik sira asesu ba edukasaun ho distánsia besik.
Notísia relevante: RAEOA aloka millaun $2-resin harii eskola foun 19 no hadi’a edifísiu rua
“Liuhusi inaugurasaun ne’e espera katak tulun ona prosesu ensinu aprendizajen ne’ebé ho dignu mezmu iha sala rua de’it, maibé ida-ne’e mudansa primeiru no tulun ona ami edukasaun atu haree mós fatin seluk ne’ebé sei presiza kria edifísiu foun”, Cono dehan iha ámbitu inaugurasaun edifísiu iha Nunuheno, ohin.
Dirijente Edukasaun ne’e adianta katak obra rua ne’e kompleta kedan ho instalasaun bee-moos, eletrisidade no fatin halimar ba labarik sira.
“Kona-ba mobiliáriu sira, meza no kadeira iha, karik la sufisiente mak ita haree oinsá bele apoia”, salienta.
Notísia relevante: Autoridade RAEOA harii pré-eskolár rua no EBF ida iha aldeia Sanane
Iha fatin hanesan, Koordenadora EPE Letemafo Nunuheno, Domingas de Fátima Marques, informa EPE ne’e akumula alunu hamutuk 38 ho profesór na’in-rua.
“Agradese ba Governu tanba ho edifisíu foun ne’e tulun ona labarik sira iha bairru laran bele asesu ba edukasaun pré-eskolár, tanba labarik sira idade sei ki’ik hela. Bainhira tinan lima to’o neen sira bele tama ba Eskola Bázika Filiál, entaun presiza hakbesik edukasaun ba sira atu aprende”, nia afirma.
Xefe suku Cunha, Domingos Seco Caunan, relata katak estabelesimentu EPE dezde 2022 ne’e mai husi kontribuisaun komunidade Nunuheno, liuliu insiativa huis inan-aman no intelektuál iha suku.
“Ha’u reprezenta komunidade, ami sente orgullu tanba inísiu harii eskola ne’e, komunidade Nunuheno mak kontribui tali-tahan no bebak to’o Governu halo edifísiu foun, ne’ebé rekomenda presiza aumenta saladeaula, tanba kada tinan númeru alunu aumenta”, nia sujere.
Ensinu Pré-Eskolár Oétulu konstrui husi empreza Leorota Unipessoal Lda ho valór osan $79.541,16 no Pré-Eskolár Nunuheno ezekuta husi empreza Elu Coet Unipessoal Lda ho valór kontratu $83.749,29. ho durasaun servisu durante tinan ida, hahu iha Outubru 2023 no konklui iha Outubru 2024.
Jornalista: Abílio Elo Nini
Editora: Maria Auxiliadora
