VIQUEQUE, 05 outubru 2024 (TATOLI)- Servisu Edukasaun munisípiu Viqueque, tersa ne’e, hahú fó ezame nasionál daruak “ezame susulan” ba estudante sekundáriu ida husi ensinu sekundáriu Cristal Viqueque.
“Ohin ami hamutuk ho profesór sekundáriu Cristal fó hela ezame (susulan) ba estudante na’in-ida ne’ebé iha momentu ezame nasionál estudante referida hetan moras”, Diretór Edukasuan munisípiu Viqueque, Júlio Sakadura, ba TATOLI,I.P iha ninian kna’ar fatin, Beloi, ohin.
Ezame nasionál ba daruak ne’e hala’o durante loron tolu no lori pontu ezame ba nasionál hodi hala’o prosesu koresaun.
“Pontu ezame ne’e bázeia ba pontu ezame nasionál ne’ebé mak foin lalais liu ona, maka fó fali ba estudante tuir ezame. Lolos ne’e munisípiu Viqueque estudante na’in-rua, ida husi ensinu Báziku Sentral (EBC, sigla portugés) Iraler, maibé estudante ne’e lakohi eskola ona. Tanba ne’e ohin la partisipa ezame daruak”, nia hato’o.
Alende ne’e nia dehan, kona-ba rezultadu ezame nasionál ba anu letivu tinan 2024 sei fó sai dala ida iha loron 13 Dezembru.
Tuir dadús estudante klase 3 husi munisípiu Viqueque ne’ebé partisipa ona ezame nasionál kompostu husi EBC no EBF hamutuk 1.752, ESG no ESGF 1.398, ESTV na’in-82 ho totál rihun 3.232 husi eskola 44 iha munisípiu Viqueque.
Jornalista : Vitorino Lopes da Costa
Editór : Florencio Miranda Ximenes
