DILI,05 novembru 2024 (TATOLI)— Durante loron boot finadu, hahú husi loron 01 outubru to’o loron 03 novembru, asidente tráfiku ne’ebé mak rejistu iha emerjénsia HNGV hamutuk 20-resin no kazu krime (tiru ida), Xefe Departamentu Emerjénsia iha Hospitál Nasionál Guido Valadares (HNGV), Julia Rodrigues relata.
“Husi númeru asidente tráfiku 20-resin ne’ebé mak rejistu iha sala unidade emerjénsia, feto hamutuk na’in-11 no mane hamutuk na’in-15,” Julia Rodrigues Quintão ba jornalista sira iha HNGV, ohin.
Nune’e mós Xefe Departamentu Emerjénsia ne’e relata katak dadus pasiente ne’ebé mak rejistu iha emerjénsia durante fulan-outubru hahú husi loron 1 to’o 30 hamutuk 5.173.
“Iha ne’ebá feto hamutuk 2.079, mane 2.474. Husi númeru ne’e, pasiente ne’ebé mak baixa (interna) hamutuk na’in-1.364 no alta hamutuk 2.812,” nia konfirma.
Pesoál saúde ne’e esplika, pasiente ho númeru 5.173 ne’ebé mak rejistu iha sala emerjénsia ne’e maioria labarik ki’ik-oan ho moras ne’ebé mak variedade mak hanesan moras laran, pulmaun no seluktan.
Kona-ba tiru, nia informa, joven mane ida hetan duni tiru iha kelen, iha loron 2 novembru kalan ho kondisaun la’ós fó ameasa ba nia vida, maibé mai iha emerjénsia pesoál saúde sira fó atendementu, depois ba haruka halo internamentu fali iha sala Unidade Sirurjia hodi kontinua tratamentu ba nia saúde.
“Pasiente mai iha sala emerjénsia ita-nia médiku sira fó atendementu hotu depois lori fali ba sirurjia Águda atu kontinua halo tratamentu iha ne’ebá,” nia hatutan.
Iha fatin hanesan, pasiente Joel Cardoso Correia, haktuir kona-na kronolojia tiru katak sira hamutuk hodi la’o halimar ba Cristo Rei iha tuku 11:00 kalan sira hemu tua iha ne’ebá, depois fila mai husi Cristo Rei iha to’o iha Palásiu Governu nia kolega ida ho monu motor, entaun vítima ne’e ajuda kolega ne’e maibé sidadaun feto ho mane ida tula malu, derrepente sidadaun mane ne’ebé uza sívil foti pistola hodi tiru ba estrada mak kona vítima nia kelen hodi kanek.
“Ami fila husi Cristo Rei to’o iha Palásiu, ha’u-nia kolega ida hit motor oin maka derrepente monu, entaun ha’u tuun ajuda kolega maibé Maun ida ho sívil hamutuk feto ida maibé ha’u la koñese sira na’in rua, derrepente tuun mai rasta kolega ne’e hodi baku”.
“Entaun ha’u atu ajuda kolega ne’e nia foti pistola hodi tiru ba estrada, maibé la dook husi ha’u hamrik, entaun nia tiru ba estrada hodi kona ha’u-nia kelen, entaun ha’u halai ba markas UPM hodi husu ajuda, mas ha’u haree maun sira intelejen sira tuur hodi haree ha’u de’it, balun la’o ses tiha, depois membru UPM ida mak lori ha’u mai HNGV,” pasiente ne’e informa.
Nia esplika, maske nia tiru estrada mak kona vítima, maibé kazu referidu sei levanta ba oin, tanba vítima ho nia kolega sira la’o ba Cristo Rei fila mai to’o iha Palásiu Governu la halo krime ida maibé derrepente sidadaun ida ho sívil tiru estrada rezulta vítima kanek no interna iha HNGV.
“Ha’u-nia família sei levanta ba oin tanba ami la’ós baku ema iha ne’ebá maibé nia uza kilat hodi tiru, tanba ha’u kanek ona kolega sira hakarak ba haree ha’u, sira dehan imi mete hotu ga,hakarak lori pistola tiru tan, mak sira mós ta’uk halai liu ba uma,” nia konklui.
Jornalista : Felicidade Ximenes
Editór: Rafael Ximenes de A. Belo
