DILI,05 novembru 2024 (TATOLI)—Governu Japaun ho Fundu Nasaun Unidas ba Labarik (UNICEF), entrega tablet komputadór 98 no router 84 ba Ministériu Saúde hodi habelar teknolojia saúde dijitál iha Sentru Saúde Komunitária no Servisu Saúde Munisípiu sira iha Timor-Leste.
Governu Japaun ho UNICEF ofisialmente disponibiliza tablet komputadór 98 no router 84 ba Ministériu Saúde hodi habelar teknolojia saúde dijitál iha Sentru Saúde Komunitária 73 no Servisu Saúde iha munisípiu hotu iha Timor-Leste.
“Projetu ne’e finansia husi Governu Japaun no implementa husi UNICEF, ho objetivu atu hasa’e sistema saúde dijitál iha Timor-Leste. Espesifikamente projetu ida-ne’e envolve fornesimentu ekipamentu informátiku ka IT nian, hanesan tablet no router, hodi estabelese sistema ida ne’ebé metin ba jestaun dijitál informasaun vasinasaun nian”, Vise Xefe Misaun Embaixada Japaun iha Timor-Leste Yuki Sakai, dehan iha nia diskursu iha salaun Palásiu Sinzas Caicoli, ohin.
Sakai dehan, dijitalizasaun nia papél importante iha kuidadu saúde modernu, introdusaun teknolojia dijitál, la’ós de’it transforma jestaun dadus, maibé mós iha potensiál atu hadia ho signifikativu kualidade servisu kuidadu saúde nian.
“Ha’u fiar katak akumulasaun dadus saúde nian ne’ebé oioin ho kualidade aas iha nasaun tomak sei kontribui ba prevensaun moras, diagnóstiku lalais no realizasaun medisina personalizada, enkuantu permite planeamentu polítika nasionál ne’ebé efetivu liu”, nia relata.
Nia afirma, impaktu loloos hosi inisiativa ida-ne’e sei hetan bainhira pesoál sentru saúde nian sira bele utiliza tablet sira ho efetivu, atu garante ida-ne’e, UNICEF sei hala’o sesaun formasaun oioin hodi kapasita profisionál saúde sira atu uza ferramenta hirak-ne’e. Japaun fó ona apoiu ba dezenvolvimentu Timor-Leste durante tinan 25 ona, molok independénsia iha tinan 1999.
“Nu’udar belun Timor-Leste nian, ami hakarak kontinua fó apoiu ba dezenvolvimentu nasaun ida-ne’e nian hosi perspetiva oioin. Ami hein katak ita-boot sira sei aproveita projetu ida-ne’e hodi hadia sistema kuidadu saúde nian. Ami sente kontente tanba Japaun bele kontribui hodi hametin sistema jestaun saúde iha Timor-Leste”, nia afirma.
Iha fatin hanesan, Ofisiál Responsavel ba UNICEF iha Timor-Leste, Cheah Yew Hee, agradese ba Embaixadór Japaun iha Timor-Leste, ba sira-nia apoiu jenerozu hodi harii sistema saúde lokál, liuhosi mellora kapasidade no fasilidade sira iha nivel sub-nasionál, dijitalizasaun dadus saúde nian ne’e, sei ajuda jere dadus ho efisiénsia no halakon sistema bazeia ba surat-tahan.
“Iha tinan 2021, UNICEF fó apoiu ba Ministériu Saúde hodi rejista no rai dadus vasinasaun COVID-19 liuhosi aplikasaun ida ne’ebé mós serve hanesan sertifikadu vasinasaun dijitál COVID- 19. Ministériu Saúde nia vizaun atu habelar aplikasaun ida-ne’e, hodi rejista detallu husi ema ida-idak ne’ebé mak vizita fasilidade saúde ba kualkér asisténsia saúde”, Cheah Yew Hee dehan.
Hee relata, iha ámbitu saúde dijitál nian sei foka liu ba distribuisaun ekipamentu, Teknolojia, Informasaun no Komunikasaun ka ICT, ba Sentru Saúde Komunitária sira ne’ebé mak funsiona ho di’ak no servisu saúde munisípiu ida-idak. Aleinde ne’e, formasaun nivel nasionál ba formadór sira atu hahú iha fulan-Novembru no formasaun tuir-mai iha munisípiu sira sei hahú iha fulan-Dezembru 2024. Pontu fokál tékniku sira husi Ministériu Saúde no UNICEF sei hala’o vizita monitorizasaun konjunta no fornese treinamentu iha fatin- servisu no treinamentu atualizasaun. Investimentu hirak ne’e atu asegura rejistu dadus, análize no relatóriu ne’ebé di’ak husi munisípiu sira, ba baze dadus saúde nasionál.
Vise Ministru Fortalesimentu Instituisionál Saúde, José dos Reis Magno, agradese ba apoiu tomak ne’ebé husi UNICEF ho Embaixada Japaun mai setór saúde hodi mellora di’ak liután prestasaun saúde ba bem estar populasaun Timor-Leste nian.
“Agradese ba Guvernu Jepaun, liuhusi Embaixada Japaun iha Timor-Leste no mós liu husi UNICEF bele tulun Ministériu Saúde, fahe tan ekipamentu ICT/IPAd, ba Pesoál sira, nune’e sira bele uja hodi inserta dadus hotu ba iha Sistema DHIS2/TLHIS, no tulun sira bele análiza no interpreta dadus sira iha sistema ho di’ak”, Magno hateten.
Xefe Departamentu Administrasaun Lojístika no Finansa husi Munisípiu Ermera, Grispin Maia, dehan importánsia husi ekipamentu sira ne’e mak presiza dijitalizasaun no informasaun saúde sira atu nune’e hafasil di’ak liután ba dadus sira nune’e, bele kontribui ba asisténsia saúde iha Timor-Leste.
Jornalsita : Felicidade Ximenes
Editór : Zezito Silva
