DILI, 05 novembru 2024 (TATOLI)—Komisaun D trata asuntu Ekonomia no Dezenvolvimentu iha Parlamentu Nasionál (PN), ko’alia hela ka aproxima daudaun ho parte ezekutivu liuhusi ministériu kompetente no parte relevante sira seluk atu halo alterasaun ba lei investimentu.
“Ami ko’alia hela ho Governu no parte interresante sira seluk, atu bele haree hamutuk ba alterasaun lei investimentu no sosiedade komersiál,” Prezidente komisaun D, Ricardo Baptista, hateten ba jornalista sira iha resintu PN, tersa ne’e.
Komisaun iha hanoin atu halo alterasaun ba lei investimentu maibé órgaun ne’ebé atu ezekuta mak Governu, nune’e parte komisaun bolu parte ezekutivu atu bele iha hanoin hamutuk oinsá karik iha mudansa ruma liga ba lei investimentu no lei sosiedade komersiál
Tanba ne’e, nia dehan, presiza ko’alia ho ezekutivu no entidade sira seluk ne’ebé iha ligasaun hanesan Kámara Komérsiu Indústria Timor-Leste (CCI-TL, siglá portugés) rona mós sira-nia hanoin kona-ba alterasaun ne’e, nune’e hotu-hotu hetan benefísiu lei ne’e rasik.
Komisaun hein Governu atu aprezenta inisiativa alterasaun ne’e no bainhira inisiativa tama sei fó prioridade diskusaun altera lei investimentu hodi regula ema estranjeiru hala’o atividade negósiu iha rai-laran.
Nia dehan, relasiona xineza no negosiante estranjeiru sira seluk loke loza ka hala’o atividade negósiu tun to’o ba iha munisípiu ka área rurál sira, hanoin lei investimentu la bandu ida-ne’e no lei ne’e loke dalan atu sé de’it mak mai husi estranjeiru bele halo negósiu.
Preokupasaun sira-ne’e loos, karik asuntu ne’e importante bele haree oinsá mak atu regula negósiu ne’ebé ema estranjeiru sira loke, depois bele haree tanba labele taka dalan entaun fó fali impaktu ba Timor-Leste no loke luan ne’e ninia impaktu mós ba negosiante timoroan ne’ebé loke negósiu kiik sira-ne’e.
“Ida-ne’e mak ita sei haree. Ita mós hatene ita-nia nasaun ne’e adota hela merkadu livre, ne’ebé aleinde ema lori sasán husi fatin hotu-hotu mai faan iha Timor-Leste. Hanoin, ita-nia lei investimentu fó dalan ba estranjeiru bele mai ho kapitál kiik-oan rihun $50, sira bele loke sira-nia negósiu iha ita-nia rain,” nia hateten.
Tanba ne’e, nia dehan, preokupasaun sira kona-ba estranjeiru sira hanesan xineza ho ema estranjeiru sira seluk mai iha Timor-Leste loké atividade negósiu hanesan ho timoroan ne’e, Komisaun toma nota hela.
Preokupasaun hanesan, nia hateten, parte CCI-TL mós hato’o ona preokupasaun ne’e iha PN oinsá atu tau atensaun.
Jornalista : Nelson de Sousa
Editór : Cancio Ximenes
