VIQUEQUE, 05 outubru 2024 (TATOLI)-Komandante Polísia Nasionál Timor Leste (PNTL) iha Munisípiu Viqueque, Superitendente Antonio Rego Fernandes, informa, durante selebrasaun loron finadu iha munisípiu Viqueque konsege rejista kazu ofensa integridade fíziku simples ida, maibé aprezanta ona ba Ministériu Públiku (MP) hodi prosesu tuir lei.
“Durante loron finadu hahú husi loron 1 to’o loron 2 Novembru serimónia kari ai-funan iha semitériu públiku sira iha munisípiu Viqueque kuaze la’o di’ak no situasan hakmatek. Maibé, iha loron 3 Novembru mosu akontesimentu agresaun fíziku husi oknum FALINTIL-Forsa Defeza Timor Leste(F-FDTL) hasoru vítima Gulherminho Gomes Soares, iha suku Maluru, Postu Viqueque Vila. Akontesimentu ida-ne’e parte vítima hato’o ona keixa ba eskuadra PNTL Viqueque Vila no kazu ne’e aprezenta ona ba Ministériu Públiku hodi kontinua prosesa kazu ne’e ba iha Tribunál”, Komandante PNTL, informa ba jornalista sira, iha ninia kna’ar fatin, Viqueque, tersa ne’e.
Tuir kronólija kazu referidu katak problema mosu tanba família vítima no suspeitu inisiál DS no N aman maun-alin, antes ne’e sira iha problema, vitima ho suspeitu ne’e insulta malu liuhusi telemovél, hafoin ida-ne’e suspeitu fó hatene ba ninia maluk (F-FDTL) sira ba halo agresaun fíziku tuku tebe hasoru vítima.
“Tipu kazu ofensa integridade simples ne’e aprezenta ona ba MP no ami mós aprezenta relatóriu ida ba Komandu F-FDTL hodi haree kazu referida”, nia afirma.
Iha fatin ketak, Vítima Gulherminho Gomes Soares, informa nia parte hato’o ona kazu ne’e bai keixa iha MP ho kompleta kronolojia sira.
“Bazeia ba insidente ne’ebé akontese ha’u hanesan vítima hakarak prosesu kazu ne’e tuir dalan Justisa,” nia afirma.
Jornalista : Vitorino Lopes da Costa
Editór : Florencio Miranda Ximenes
