DILI, 05 novembru 2024 (TATOLI) – Pasiente sira besik 80 mak seidauk ba halo tratamentu iha estranjeiru tanba Ministériu Saúde seidauk rezolve hotu problema dívidas iha Ospitál Indonézia, Malázia no Singapura.
“Ba entervista Vise Ministru Saúde de’it, osan iha ha’u-nia liman ka, osan iha ha’u-nia bolsu ka”, Ministra Saúde, Elia dos Reis Amaral, dehan ba jornalista sira no hatudu bolsu ba jornalista sira iha uma Fukun Parlamentu Nasionál, ohin.
Aleinde ne’e mós, jornalista sira tenta atu konfirma Ministra Saúde, kona-ba inforasaun ne’ebé viral katak feto ida ne’ebé durante ne’e halo tratamentu iha Malázia maibé haruka fila tanba seidauk selu dívida, ikus mai, hakotu iis, maibé ministra lakohi koalia, tanba razaun katak osan la’os iha nia liman.
Antes ne’e, jornalista sira tenta konfirma Vise Ministru Fortalesimentu Institusionál Saúde, Jose Magno kona-ba asuntu ne’e, tanba iha ona pasiente ne’ebé lakon vida ne’ebé konsege halo antigun Ministru Saúde balun lamenta no triste, tanba konsidera kondisaun saúde iha Timor-Leste grave los ona, maibé nia parte lakohi ko’alia ho razaun tanba ne’e kompeténsia Ministra Saúde nian.
Vise Ministru Asuntu Parlamentar, Aderito Hugo, afirma problema dívidas iha ospitál rai liur ne’ebé Ministériu Saúde halo akordu mak Opsitál Pantay Malázia, Ospitál North Elisabeth Singapura no Ospitál Siloam Jakarta Indonezia, to’o ona iha Konselhu Ministru no Governu tau ona konsiderasaun,, nune’e sei halo pagamentu fazeademente tanba ho montante ne’ebé mak boot.
“Dezde akontesementu ne’e, ba to’o iha nivel Konsellu Ministru no KM akompaña dezempeñu Ministériu Saúde nian ba kestaun dívidas, portantu imi hotu hare’e iha orsamentu 2025 nian, proposta ne’e mai aloka mós montante mais 10 millões ida atu hare’e ba dívidas ne’e”, Aderito Hugo informa.
Nia esplika, dívidas ne’e, Ministériu Saúde no Ministériu Asuntu Kombatente Libertasaun Nasionál mós buka hela meius, oinsá ospitál hirak ne’ebé mak durante ne’e asina akordu ho Governo Timor-Leste kontinua loke odamatan ba pasiente sira.
Jornalista : Felicidade Ximenes
Editór : Zezito Silva
