DILI, 05 novembru 2024 (TATOLI)–Sekretáriu Estadu Floresta (SEF), Fernandino Vieira da Costa, hateten sistema agrofloresta di’ak ba agrikultór sira iha Timor-Leste hodi implementa atu bele hetan sustentabilidade ba tempu badak no naruk iha kolleta.
“Ita-nia rai ne’e hetan problema boot iha bailoron naruk. Ita iha Governu Konstitusionál da-sia (IX) kontinua promove programa agroflorestál. Entaun, oinsa bele halo jestaun ba rekursu ne’ebé mak iha,” Fernandino Vieira da Costa hateten iha nia diskursu, iha enkontru entre diresaun hotu-hotu iha Ministériu Agrikultura, Pekuária, Peska no Floresta no parseiru sira iha JL. Vila Fatuhada, tersa ne’e.
Prátika agrikultura iha área rurál sei mínimu liu, ida-ne’e mós obstakulu ida ba ema hotu, entaun Governu nia papel mak akompaña agrikultór sira ba hala’o prátika agrikultura tuir sistema no kondisaun atu labele estraga floresta no ambiente.
Tuir nia, pratika agrikultura ne’ebé ladi’ak bele afeta ba iha jestaun floresta ne’ebé iha, tanba ema hotu hatene maioria agrikultura oukupa foho lolon, entaun tenke iha kuidadu prátika agrikultura.
“Sistema ida-ne’ebé merese liu mak atu adota iha ita-nia rai mak sistema agrofloresta,” nia hateten.
Ministru Agrikultura, Pekuária, Peska no Floresta (MAPPF), Marcos da Crus, hateten Timor-Leste presiza duni iha polítika ida oinsá dezenvolve rekursu rai ne’ebé kiik ba iha área agrofloresta.
“Ita dezenvolve ita-nia rai atu fó sustentabilidade ba ema, agora no ba futuru. Di’ak tebesm ita ko’alia asuntu ida-ne’e. Durante ne’e, ita halo reflorestasaun oinsá atu proteje ita-nia rai atu labele iha degradasaun no bele iha valór ekonomia, sosiál no kulturál atu ita hela iha fatin ida hakmatek,” Governante ne’e hateten.
Tuir nia, dezenvolvimentu kafé mak hanesan modelu agrofloresta katak kuda kahur malu, nune’e ai fó benefisiu ba prazu tempu naruk no iha okos iha kafe, talas no fehuk ne’e agrikultor sira bele halo koleta iha tempu badak.
“Agrofloresta katak kuda ai-horis oioin de’it iha fatin ida-ne’ebé balun kolleta iha tempu badak no balun hein ita kolleta iha tempu naruk,” nia dehan.
Governante ne’e mensiona, Timor-Leste mós iha área florestál hamutuk 44 iha terrestre no rua (2) iha marina ne’ebé tama ba iha área peska nian.
“Ita mós iha biodiversidade terrestre no mariña no ba riku soin moris. Ba oinm ita buka konserva no prezerva hodi fó benefísiu sai nasaun no Estadu ida iha mundu,” nia hateten.
Jornalista : Jesuína Xavier
Editór : Cancio Ximenes
