DILI, 06 novembru 2024 (TATOLI)—Komisaun C trata asuntu Finansa Públika iha Parlamentu Nasionál (PN), ninia rekomendasaun ba Governu relativa ho proposta lei Orsamentu Jerál Estadu (OJE) 2025 atu tau atensaun ba levantamentu fundu petrolífeiru liu Rendimentu Sustentável Estimadu (RSE) kontinua finansia despeza korrente.
“Rekomenda ba Governu, lei fundu petrolífeiru prevee levantamentu hotu acima RSE (Rendimentu Sustentável Estimadu) atu utiliza hodi finansia despeza investimentu kapitál ba dezenvolvimentu investimentu estratéjika nasaun nian, maibé verba ne’e kontinua livremente utiliza husi Governu hodi finansia despeza korrente. Apezár susesivu alerta komisaun C. Rekomenda ho maiór prudiénsia iha levantamentu fundu, nune’e Governu antesipa ninia esgotamentu ba 2035,” Relatora, Aliança da Conceição Araújo, halo leitura relatóriu no paresér komisaun C nian, iha plenária iha ámbitu debate proposta OJE 2025 iha faze jeneralidade ba da loron dahuluk iha sala plenária PN, kuarta ne’e.
Komisaun mós rekomenda redusaun pezu serbisu jerál administrasaun públika iha orsamentu, liuhusi reforma administrativa, ne’ebé inklui análiza despeza no introdusaun prátika jestaun efisiente liu, hanesan dijitalizasaun no automasaun prosesu, ajusta ne’e bele liberta rekursu importante ba setór prioritáriu no aumenta efisíensia administrasaun públika.
Alokasaun aas ba asuntu ekonomiku sira presiza aproximasaun estatéjiku no dixiplinadu, atu masimiza impaktu, komisaun C rekomenda ezisténsia sistema monitorizasaun no avaliasaun ne’ebé rigorozu hodi garante katak investimentu sira aliña ho objetivu dezenvolvimentu sustentável no inkluzaun sosiál, hodi promove retornu ne’ebé klaru ba sosiedade.
Programa no no projetu sira tenke hetan revizaun no ajustamentu beibeik atu asegura utilizasaun di’ak-liu rekursu sira.
Rekomenda atu implementa estratéjia ida hodi hamenus gradualmente levantamentu sira husi fundu petrolíferu hodi bele garante tempu naruk husi rekursu sira fundu nian, ne’ebé liga ba dezempeñu husi reseita sira-ne’ebé la’ós petrolíferu no kreximentu ekonómiku.
Komisaun C rekomenda, promosaun ba reforma tributária sira-ne’ebé habelar baze tributária no introdús progresividade iha impostu sira, aprovasaun ba lei foun sira, hanesan implementasaun IVA no impostu seletivu bele aumenta kobransa reseita doméstika, hamenus presaun ba fundu petrolíferu.
Antes ne’e, Vise Ministra Finansa (MF), Felicia Claudinanda Crus, hateten proposta Orsamentu Jerál Estadu (OJE) ba tinan fiskál 2025 ho montante billaun $2.6, mak Governu sei foti husi fundu petrolíferu biliaun $1,561,073,539.
Nia dehan, OJE 2025 finansia liuhusi konbinasaun reseita doméstika, levantamentu sira husi fundu petrolíferu no fonte sira seluk, hanesan ba administrasaun sentrál ho totál biliaun $2,072,981.000, reseita doméstika Governu sei rekolla millaun $257.909,461 iha tinan 2025 aumenta 33% kompara ho tinan kotuk, ida-ne’e inklui reseita fiskál sira husi saláriu no impostu sira ba rendimentu no mós reseita sira la’ós fiskál husi venda no serbisu sira.
“Levantamentu husi fundu petrolíferu billaun $1,566,73,539 sei foti husi fundu petrolíferu ne’ebé kompostu husi Rendimentu Sustentável Estimadu (RSE) millaun $551,949,714 no liu RSE ho biliaun $1, 009, 123, 825,” Vise Ministra Finansa, Felícia Claudinanda Cruz, hato’o iha audiénsia públika ba proposta OJE 2025 ho komisaun C trata asuntu Finansa Públika no D trata asuntu Ekonomia no Dezenvolvimentu iha sala plenária PN, (25/11).
Levantamentu sira-ne’e esensiál ba finansiamentu infraestrutura no programa sosiál sira-ne’ebé dudu kreximentu ekonomiku ba tempu naruk.
Aleinde ne’e, uza balansu kaixa tezouru ka saldu jerénsia hamutuk millaun $200, no utiliza mós empréstimu externu millaun $45 hodi finansia projetu infraestrutura estratéjiku sira iha pogresu nia laran ne’ebé sei hamosu retornu ekonómika iha futuru, no millaun $9 apoiu orsamentu direta husi Governu Austrália ba iha programa saúde, mobilizasaun laborál no Programa Nasionál Dezenvolvimentu Suku (PNDS).
Ba Rejiaun Administrativa Espesiál Oé-Cusse no Ambeno (RAEOA) ho totál millaun $62,181 uza balansu saldo ka saldo jerénsia hamutuk millaun $51,466,810.
Vise Ministra hateten, reseita la’os fiskál rihun $615,190 no transferénsia husi administrasaun sentrál hamutuk millaun $10, ba seguransa sosiál ho totál millaun $482,008,234, Institutu Seguransa Sosiál (INSS) millaun $166,313,689, kontribuisaun seguransa sosiál millaun $52,665,689, transferénsia husi administrasaun sentrál millaun $124,250, fundu rezerva seguransa sosiál millaun $305,692,545.
Jornalista : Nelson de Sousa
Editór : Cancio Ximenes
