DILI, 06 novembru 2025 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál (PN) liuhusi relatóriu no paréser relativa ho proposta Orsamentu Jerál Estadu (OJE) 2025 rekomenda ba Ministériu Edukasaun (ME) atu tau atensaun ba problema menus manorin no kondisaun infraestrutura eskola iha territóriu.
Notísia Relevante: Tinan 2025: ME prevee millaun $113-resin finansia programa lima
“Rekomenda atu nafatin kontinua bolsa kandidatu, tanba tuir komisaun nia fiskalizasaun kontinua identifika eskola sira maioria hasoru nafatin falta profesór sira,” Deputada Relatora, Aliança Conceição Araújo, halo leitura ba relatóriu no paréser setoriál husi komisaun permenante sira iha ámbiru debate proposta OJE 2025 iha faze jeneralidade iha sala plenária PN, kuarta ne’e.
Ministériu Edukasaun tenke kontinua fó atensaun ba eskola sira-ne’ebé hasoru difikuldade tanba falta meza no kadeira, saladeaula, biblioteka no materiál ba aula prátika ne’ebé la sufisiente, liuliu ba estudante sira iha eskola ensinu sekundáriu tékniku vokasionál (TEKVOK).
Ministériu tenke kontinua kolabora ho autoridade munisipál sira hodi akompaña implementasaun programa merenda eskolár no projetu infraestrutura edukasionál ne’ebé harii iha programa ida hanaran Programa Nasionál Dezenvolvimentu Suku (PNDS).
“Ministériu tenke promove formasaun kontínua no programa formasaun ba profesór sira, ho foku espesiál ba metodolojia ensinu no dezenvolvimentu abilidade prátika sira, hodi garante aprendizajen ho kualidade aas liu iha eskola sira,” Deputada relatora hato’o.
Ministériu tenke fó prioridade ba hadi’a kondisaun sira iha eskola rurál no eskola sira-ne’ebé susar atu hetan asesu, ne’ebé dala barak hasoru menus rekursu no profesór sira-ne’ebé boot liu, hodi garante katak sira hetan apoiu adekuadu no regulár.
Rekomenda atu implementa insentivu ba profesór sira-ne’ebé aseita atu serbisu iha área remota ka rurál, hanesan benefísiu adisionál ka kondisaun uma nian, hodi atrai profisionál barak liután ba área sira-ne’e.
Ministériu tenke implementa sistema monitorizasaun rigorozu ida ba ezekusaun orsamentál iha tinan 2025, ho relatóriu periódiku sira-ne’ebé permite avaliasaun kontínua kona-ba efikásia alokasaun rekursu nian no identifika desviu potensiál sira.
Sistema ne’e tenke inklui indikadór dezempeñu ne’ebé halo posivel atu avalia impaktu husi desizaun orsamentál ba kualidade no ekuidade sistema edukasionál.
Ministériu tenke hadia transparénsia iha aprezentasaun no justifikasaun orsamentu nian, hodi komunika ho klaru desizaun sira no nia impaktu iha área oioin sistema edukasaun nian.
Fornese informasaun detallu kona-ba alokasaun rekursu no rezultadu sira-ne ebé hein sei permite avaliasaun ida-ne ebé di’ak-liu kona-ba efikásia jestaun orsamentu no responsabilizasaun ne’ebé boot liu.
Jornalista : Nelson de Sousa
Editór : Cancio Ximenes
