DILI, 06 novembru 2024 (TATOLI)—Prezidente Komisaun C trata asuntu Finansa Públika iha Parlamentu Nasionál (PN), Cedelízia Farria dos Santos, hato’o apresiasaun ba Governu konstitusionál da-sia ne’ebé aprezenta proposta Orsamentu Jerál Estadu (OJE) ho montante biliaun $2,6.
‘’Hato’o apresiasaun ba aprezentasaun husi Primeiru-Ministru (PM) hato’o mai ho esplikasaun klaru kona-ba objetivu, medida xave sira no asuntu sira-ne’ebé relasiona ho OJE 2025 nian. Ho ida-ne’e, ami hato’o apresiasaun boot,” Prezidente Komisaun C ne’e hato’o perante iha debate ba proposta OJE 2025 faze jeneralidade ba loron dahuluk iha sala plenária PN, kuarta ne’e.
Nia dehan, OJE ne’e improtante tebes hanesan haree ba lema husi OJE 2025, investimentu estratéjika iha área infraestrutura hodi reforma ekonomia no mellora bein estar sidadaun nian,
“Loos duni, Timor-Leste bele dehan ita mukit tebes iha infraestrutura estratéjika, tanba ne’e ita hakarak hadi’a bein estar tenke foku duni ba área ida-ne’e. Tanba, ita ko’alia kona-ba infraestrutura, ita la’ós ko’alia de’it ponte no estrada maibé ita hakarak kualidade edukasaun ne’ebé mak di’ak. Aleinde kualidade profesór no matéria didátiku no alunu sira, ita mós presiza infraestrura ba saladeaula ba estudante sira,” nia dehan.
Se ko’alia kona-ba irrigasaun, nia dehan, Governu tenke haree mós infraestrutura ne’ebé koloka barajen, fatin ba prezerva bee nian, irrigasaun no seluk tan, ida-ne’e signifika kona-ba infraestrutura.
Ko’alia kona-ba saúde, nia hateten, la’ós hateten de’it iha medikamentu, tratamentu saúde ne’ebé mak di’ak maibé mós tenke foku ba infraestrutura hanesan harii ospitál sira, sentru saúde iha munisípiu Dili de’it, maibé iha munisípiu sira hotu, ida-ne’e signifika iha lema orsamentu tau ne’e loos duni, foku duni ba infraestrutura.
“Se ita ko’alia kona-ba área turizmu tenke hadi’a duni fatin turizmu sira, ho ida-ne’e ita presiza koloka osan duni iha infraestrutura. Se ita ko’alia kona-ba Timor-Leste tenke halo konesaun ba mundu, ita tenke hadi’a duni ita-nia aeroportu no ita tenke iha koneksaun internet ne’ebé mak di’ak. Ne’eduni, tema ne’ebé Governu ko’alia kona-ba infraestrutura estratéjiku ne’e iha dalan duni,” nia hateten.
Ho nune’e, orsamentu ne’ebé aloka ba área sira ne’e importante tebes.
Deputada husi bankada CNRT ne’e observa mós Governu submete proposta OJE 2025, submete ho setór tolu mak hanesan sub-setór administrasaun sentrál, seguransa sosiál no RAEOA no mantein orsamentu por programa.
“Ami apresia ne’ebé Governu mai ona ho opsaun prinsipál tolu, ho hanaruk vida útil husi fundu petrolíferu mak hanesan; primeiru reforma sira hodi aumenta reseita doméstika, segundu medida hodi redús despeza públika no terseiru aumenta fonte alternativa liuhusi impréstimu no doasaun sira,” nia dehan.
Nia observa ba pontu rua sei redús despeza públika sira, nune’e fó hanoin katak ba oin uza fonte enérjia seluk hodi redús osan konbustível ba EDTL ne’ebé haree osan ne’e sei boot, nune’e kontinua ho polítika solar panel ne’e bele diminui osan.
Husu ba Governu atu hadi’a fatin turístika sira, tanba bainhira hetan vizita husi turista husi rai-li’ur no rai-laran ne’e bele hatama reseita ba Estadu.
Bainhira Governu mellora liu-tán agrikultura mak foos bele hetan folin ho di’ak, nune’e konkorda tebes polítika Governu nian ne’ebé tau iha OJE 2025 atu fó apoiu ba setór privadu sira hodi envolve aan iha agrikultura atu redús depedénsia ba foos importasaun.
“Ami mós hakarak fó hanoin, ita hakarak redús ita-nia depedénsia foti osan husi fundu petrolíferu. Ami mós haree katak, iha orsamentu ne’e rasik mós tau orsamentu ho montante signifikante ba fundu kapitál umanu nian, ho ida-ne’e se timoroan matenek barak ona ko’alia língua portugeza ho di’ak. Ita mós redús ita-nia depedénsia ba asesór internasionál ne’ebé tuir ami-nia haree ne’e orsamentu boot mós atu selu saláriu asesór intersionál sira. La’ós ita kontra asesór sira, maibé hanoin liu ona tinan 25 ita presiza kapasita ita-nia rekursu umanu,” nia dehan.
Tanba ne’e, Governu tau osan iha Fundu Dezenvolvimentu Kapitál Umanu (FDCH, sigla portugés), ba oin bele implementa no bele redús foti osan Estadu.
Prezidente komisaun C ne’e dehan, kona-ba foti osan iha fundu mina-rai liu Rendimentu Sustentável Estimadu (RSE) hanoin lei fó dalan, hanesan iha Governu anteriór iha tinan 2021 ne’e foti osan liu RSE millaun $830.
Iha tinan 2022 no 2020 mós hanesan, tanba istorikamente la’ós Governu Konstitusionál da-sia (IX) mak foti osan boot-liu husi RSE maibé Governu anteriór sira mós foti hela.
Tanba, Timor-Leste nia reseita doméstika ne’ebé la to’o kobre nesesidade sira, importante bainhira Governu submete dokumentu OJE, Governu kumpre kedas kriteira legál sira hanesan submisaun ida-ne’e Governu mai kedas ho esplikasaun klaru no sira halo analiza kona-ba ida-ne’e.
“Tanba ne’e, ha’u hanoin foti osan liuhusi RSE la’ós problema, importante ita kumpre ita-nia rekezitu legál sira,” nia hateten.
Nune’e, Deputada husi bankada Governu ne’e fó apresiasaun ba Governu Konstitusionál da-sia (IX) halo serbisu lubun hanesan simu vizita Amu Papa Francisco, Sekretáriu Jerál ONU, adere ona ba Organizasaun Mundiál Komérsiu (OMK) no asuntu infraestrutura sira seluk.
Jornalista : Nelson de Sousa
Editór : Cancio Ximenes
