DILI, 06 novembru 2024 (TATOLI)—Proposta-lei númeru 12/VI (2a)- Orsamentu Jerál Estadu (OJE) 2025 ho monante billaun $2,6 prienxe rekezitu formál hodi bele halo apresiasaun iha plenária faze jeneralidade.
“Paréser komisaun ne’e, ne’ebé respeita ninia konfigurasaun formál proposta-lei númeru 12/VI(2a)-Orsamentu Jerál Estadu (OJE) ba 2025 obedese iha ninia jeneralidade, ba regra esensiál lejístika formál, kumpre rekezitu formál aprezentasaun proposta-lei, tuir termu konstitusionál no rejimentál, nune’e iha kondisaun apresia iha plenária,” Relatora, Aliança da Conceição Araújo, halo leitura ba relatóriu no paresér komisaun C nian, iha plenária iha ámbitu debate proposta OJE 2025 iha faze jeneralidade ba loron dahuluk iha sala plenária PN, kuarta ne’e.
Tuir guiaun ba diskusaun no votasaun iha jeneralidade hala’o durante loron tolu (3) hahú husi 06-08 novembru tinan 1013.
Primeiru-Ministru (PM), Kay Rala Xanan Gusmão, inísia debate aprezenta proposta-lei, tuir kedas aprezentasaun relatóriu no paréser husi komisaun C trata asuntu Finansa Públika ne’e ramata, kontinua ho intervensaun husi Deputadu sira no Governu tuir tempu ne’ebé fixa ona ne’ebé atribui ba bankada parlamentár sira no Governu.
Tuir Rejimentu Parlamentu Nasionál (RPN) iha artigu 105.º (Inísiu diskusaun), iha númeru 1 hateten diskusaun iha jeneralidade foka ba prinsípiu no sistema projetu ka proposta lei ida-idak nian.
Enkuantu, tuir ajenda iha loron 11-25 novembru 2024, sei kontinua halo diskusaun ba proposta-lei OJE 2025 iha faze espesialidade.
Tuir guiaun ne’ebé iha, diskusaun no votasaun iha espesialidade hahú iha kada artigu, númeru ou alinea, no iha tabela orsamentál ho nia anexu iha proposta-lei OJE 2025, no bainhira iha proposta alterasaun mak sei halo uluk diskusaun no votasaun.
Ba proposta alterasaun aprezenta to’o finál diskusaun no votasaun iha jeneralidade, ne’ebé ho nia giaun no presiza kumpre rekezitu ne’ebé iha, nune’e hodi orienta meza iha serbisu diskusaun no votasaun proposta alterasaun ne’ebé admitidu.
Iha proposta-lei númeru 12/VI(2a) Orsamentu Jerál Estadu (OJE) 2025 hahú husi nia Expozisaun Motivu, no nia iha artigu hamutuk sia (9), ne’ebé hahú husi Kapítulu I Dispozisaun Inisiál, artigu 1 Objetu no ámbitu, Kapítulu II Orsamentu Jerál Estadu, artigu 2 Aprovasaun tabela orsamentál, artigu 3 Impostu, taxa no kontribuisaun, artigu 4 Transferénsia Fundu Petrolífeiru, artigu 5 Dívida Públika, artigu 6 Garantia, artigu 7 Transferénsia entre sub-setór.
Kapítulu III Orsamentu Seguransa Sosiál, artigu 8 Transferénsia saldu Seguransa Sosiál, Kapítulu IV Dispozisaun Finál, artigu 9 Entrada em vigór no produsaun efeitu.
Tuir RPN iha artigu 109.º (Diskusaun), iha alinea 1 hateten diskusaun iha espesialidade foka ba artigu ida-idak, la taka dalan ba buat ne’ebé previstu iha númeru tuir mai, no alinea 2 mós haktuir katak sei laiha diskusaun iha espesialidade ba artigu ida se la aprezenta proposta alterasaun ruma kona-ba artigu ne’e.
Nune’e, bainhira ramata diskusaun ba proposta-lei OJE 2025 iha faze espesialidade mak kontinua kedas votasaun iha finál globál.
Tuir ajenda, iha 26 novembru 2024, halo aprovasaun iha finál globál no iha 27 novembru 2024 ne’e komisaun C halo redasaun finál ba dekretu PN ne’ebé aprova OJE 2025, hafoin haruka ba Prezidente Repúblika (PR) mak iha kompeténsia eskluziva atu promulga.
Enkuantu, iha 01 outubru 2024, Governu liuhusi Ministra Finansa (MF), Santina Cardoso, aprezenta proposta-lei OJE 2025 ho montante billaun $2,6 ba PN ne’ebé simu direta husi Prezidente Parlamentu Nasionál, Maria Fernanda Lay.
Nune’e, liuhusi reuniaun plenária iha 07 outubru 2024, meza PN anúnsiu no baixa proposta-lei OJE 2025 ba komisaun C ho komisaun permanente sira seluk hodi bele elabora prosesu tuir mai.
Iha loron 16-17 outubru 2024, PN liuhusi komisaun C realiza seminária Panorama Orsamentál 2025.
Iha loron 18-28 outubru 2024, komisaun permanente sira halo audiénsia públika ba proposta-lei OJE 2025, hodi konvida liña ministerial sira no entidade públiku sira hodi mai aprezenta relatóriu ezekusaun OJE 2024 no hato’o planu orsamentu 2025 nian.
Jornalista : Nelson de Sousa
Editór : Cancio Ximenes
