DILI, 06 novembru 2024 (TATOLI) – Sekretaria Estadu Formasaun Profisionál Empregu (SEFOPE) despede tan tarballador timoroan hamutuk 104 atu ba servisu iha Korea.
“serimónia ida ohin hanesan baibain ita hotu hatene ita-nia traballador sira atu ba servisu iha rai liur, liuliu korea nian, entaun ita-nia kustume mak tenke asina deklarasaun entre Governu, família no traballadór sira bainhira husik Timor-Leste ba servisu iha Korea iha semana ne’e”, Diretór Nasionál Empregu Estranjeiru, João Correia Pereira, dehan iha salaun Timor Lodge, Comoro, ohin.
Pereira dehan, traballadór sira ne’e iha área fábrika no peskas durante tinan haat, entaun ohin asina deklarasaun atu sira husik Timor-Leste atu ba servisu iha Korea.
“Ami husu ba ita boot sira nafatin disiplina iha servisu, prepara mentalidade hodi hasoru situasaun foun sira iha ne’eba, tanba ne’e nafatin badinas hodi servisu atu hadia família nia moris iha rai ida-ne’e”, nia afirma.
Nia husu ba família sira atu nafatin apoia oan sira atu bele ba servisu ho di’ak hodi hadia ekonomia iha Timor-Leste.
Iha fatin hanesan, traballadora Heryanti Tuaty, agardese Governu tanba hetan oportunidade ida-ne’e atu ba servisu iha Korea durante tinan haat iha área fábrika nian.
“Ha’u kontente tebes ba oportunidade ida-ne’e atu ba servisu iha ema nia rain hodi bele sustenta fila fali família sira iha ne’e”, Heryanti Tuaty dehan.
Nia esplika, banhira servisu tinan haat iha Korea sei fila mai atu investe fila fali iha ne’e liuliu hakiak animál sira atu bele ajuda sira seluk ne’ebé mak buka servisu.
Jornalista : Felicidade Ximenes
Editór : Zezito Silva
