COVALIMA, 06 Novembru 2024 (TATOLI) – Sekretariadu Tékniku Administrasaun Eleitorál (STAE) Covalima prodús ona kartaun eleitorál biométriku ba sidadaun 200-resin iha Covalima.
Diretór STAE Covalima, Francisco Gusmão, hateten hafoin halo lansamentu ba Resenseamentu Eleitorál Atualiza Baze Dadus (RE-ABD) ho sistema biométriku, STAE halo kedan atendimentu ba populasaun sira hodi troka kartaun eleitorál, maibé hasoru difikuldade tanba sistema atu hasai kartaun depende ba rede, nomós presiza tempu.
Dirijente ne’e dehan, iha loron 04 Novembru, STAE koko Sistema Informasaun Resenseamentu Eleitorál (SIRE) Biométriku hodi atende kada loron sidadaun na’in-50 no iha loron 05 Novembru halo mudansa hodi atende kada loron ema na’in-70.
Kritériu ba sidadaun sira atu atualiza kartaun eleitorál ba biométriku mak lori dokumentu sira hanesan kartaun eleitorál orijinál, sertidaun RDTL kópia tahan ida, aprezenta billete identidade orijinál ka kópia no aprezenta pasaporte orijinál válidu no kópia tahan ida.
Resenseamentu ba sidadaun ne’ebé atinje ona tinan 16 ba leten lori sertidaun RDTL (fotokópia tahan ida), billete identidade válidu (orijinál no kópia tahan ida) ka pasaporte válidu (orijinál no kópia tahan ida), deklarasaun rezidénsia husi xefe suku no ba sidadania akredita presiza aprezenta sertifikadu sidadania Timor-Leste husi Ministériu Justisa (MJ).
Ba sira ne’ebé atu atualiza dadus hanesan hadi’a naran no loron moris, lori dokumentu hanesan sertidaun RDTL ka billete identidade, pasaporte válidu (orijinál no kópia tahan ida). Ba sidadaun ne’ebé muda hela fatin lori deklarasaun muda fatin husi suku ne’ebé hela ba no sertidaun RDTL ka billete identidade, pasaporte válidu (orijinál no kópia tahan ida).
Aleinde ne’e, ba ema ne’ebé kartaun lakon tenke lori deklarasaun lakon husi PNTL no pasaporte válidu (orijinál no kópia tahan ida).
Daudaun ne’e, tékniku STAE Covalima sei halo atendimentu ba sidadaun ne’ebé trata kartaun eleitorál iha munisípiu no seidauk halo atendimentu bá iha postu administrativu sira.
“Atu halo atendimentu ba sidadaun iha postu administrativu sira, STAE depende ba Orsamentu Jerál Estadu 2025 atu fasilita sidadaun-sira hasai kartaun eleitorál”, dehan
Rekorde katak Sekretáriu Estadu Dezenvolvimentu Lokál, Mateus dos Santos Tallo, lansa, iha 30 Outubru, Resenseamentu Eleitorál Atualiza Baze Dadus ho sistema biométriku iha Covalima.
Lansamentu RE-ABD ho sistema biométriku importante hodi moderniza kartaun eleitorál husi manuál ba sistema modernu.
Notísia relevante: Lansa ona resenseamentu eleitorál ho sistema biométriku iha Covalima
Jornalista: Celestina Teles
Editora: Maria Auxiliadora
