DILI, 06 novembru 2024 (TATOLI)–Tribunál Eklesiástiku Arkidioseze Metropolitana Dili enkamiña kazu nulidade matrimoniál ba notariadu hodi halo prosesu anulasaun ba rejistu kazamentu sívil.
Vigáriu Judisiál Tribunál Eklesiástiku Arkidioseze Metropolitana Dili, Pe. Graciano Santos Barros, hateten Tribunál Eklesiástiku kontinua hala’o serbisu hodi rejistu kazu anulasaun matrimóniu ninian la’o, ne’ebé balun rezolvidu no balun prosesa hela no balun halo rekursu.
“Ita serbisu hamutuk ho Tribunál Rekursu Estadu ninian hodi halo efeitu sivil matrimóniu ninian. Kuandu anula ona iha Tribunál Eklesiástiku, entaun notifika fila-fali Tribunál ida-idak depende kazu ne’e iha ne’ebé,” Pe. Graciano Santos Barros, hateten ba Agência TATOLI iha sede episkopál Lecidere.
Kazu sira-ne’e tribunál enkamiña ba iha notaraidu, ezemplu ema-ne’e hela iha Dili, entaun ba iha Tribunál Distrital Dili, hanesan mós ho Tribunál Covalima, Rejiaun Administrativa Espesiál Oé-Cusse no tribunal Baucau.
“Ita haruka ba iha Tribunál Rekursu Estadu nian hodi halo anulasaun ba kazamentu sivil, ita la’ós ramata de’it iha Tribunal Eklesiástiku, maibé ba mós afeta sira-ne’ebé rejistu iha notariadu,” nia dehan.
Servisu Tribunál Eklesiástiku no Tribunál Sívil Estadu nian hamutuk haree ba kazu sira ba prosesu anulasaun kazamentu sívil.
“Ami haruka ona kazu anulasaun matrimoniál ba Tribunál Sívil ka notariadu hamutuk 16 atu anula kazamentu sivil desde 2023,” nia relata.
Tribunál Eklesiástiku mós rejista kazu foun ba anulasaun matrimoniál iha fulan tolu (3) ikus ne’e hahú husi fulan-jullu to’o setembru ne’e hamutuk 10 ne’ebé nia prosesu la’o hela.
Jornalista : Jesuína Xavier
Editór : Cancio Ximenes
