DILI, 07 novembru 2024 (TATOLI)—Deputadu PLP, Abel dos Santos, fó hanoin ba Primeiru-Ministru (PM), Kay Rala Gusmão, atu tau atensaun hodi redús membru Governu sira hala’o viajen ba estranjeiru hodi konsentra ba serbisu iha rai-laran liuliu atu ezekuta Orsamentu Jerál Estadu (OJE) 2025 iha tinan oin.
“Iha ha’u-nia intervensaun ohin, hato’o ba Primeiru-Ministru (PM), aproveita iha proposta Orsamentu Jerál Estadu (OJE) 2025, se bele redús mós viajen estranjeiru ba ita-nia membru Governu sira. Redús la’ós signifika laiha viajen, maibé viajen ba ema-ne’ebé mak importante atu viajen. Se ezemplu konvite balun mai husi nasaun viziñu sira ka ba ita-nia membru Governu balun, se bele ministru, vise-ministru, sekretáriu Estadu ba lori na’in-rua (2) de’it, ita lalika lalin malu hanesan ita viajen husi Dili ba Aileu,” Nia hato’o iha intervensaun iha debate ba proposta OJE 2025 faze jeneralidade ba loron daruak iha sala plenária PN, kinta ne’e.
Nia dehan, presiza valoriza Timor-Leste nia embaixadór sira-ne’ebé destaka iha rai-li’ur, se ezemplu konvite mai ministru ne’e bele ba ho delegasaun na’in ida ka rua, tanba se ho delegasaun na’in-10 ka 20 ba la ko’alia, no sente konvite ka eventu iha ne’eba se bele fó ba embaxada iha ne’eba partisipa de’it tanba sira iha ne’eba reprezenta Timor-Leste.
Nune’e, fó hanoin ba PM se bele karik iha proposta OJE 2025 atu atensaun, tanba iha semana hira liu halo audensia ho komisaun permenente sira iha ministériu balun sira-nia ezekusaun balun atinje to’o 80-90% maibé haree fizikamente iha terrenu la to’o ho buat ne’ebé aprezenta.
“Tanba ne’e, ita redús fali ita-nia viajen estranjeiru hodi haree mós dezenvolvimentu rai-laran, tanba ita-nia ezekusaun bele hanesan ho implementasaun, ida-ne’e ha’u atu hateten de’it. Primeiru Ministru, ha’u lakohi ko’alia kona-ba osan nia boot ka kiik, no ita presiza duni hakarak halo dezenvolvimentu ba ita-nia rai maibé labele uza tuir ita-nia hakarak, tanba orsamentu ne’ebé ita tau ho planu,” nia hateten.
Deputada KHUNTO, Olinda Guterres, dehan kona-ba viajen estranjeiru hanoin PM mak hatene atu lori membru Governu sé-sé no liña ministériu sira iha direitu tomak atu hala’o viajen la’ós iha PN mak deside.
Primeiru-Ministru (PM), Kaya Rala Xanana Gusmão, dehan kona-ba viajen estranjeiru ne’e loos maibé tanba foin daudaun ba to’o Portugál ne’e hanesan fali Governu tomak ba hala’o vizita iha Portugál ne’e.
Xefe Governu, Kay Rala Xanana Dusmão, klarifika katak lori membru Governu maibé viajen ne’e la’ós tanba hakarak pasear maibé sai nu’udar rezultadu ida kona-ba programa estratéjiku kooperasaun Timor-Leste ho Portugál iha 2024-2028, nune’e asina no kada ministériu ida tenke iha millaun $75 iha apoiu ne’e.
Maibé, nia dehan, kada ministériu tenke ko’alia ho ninia omólogu iha Portugál hodi haree iha saida mak husi sorin balun bele fó apoiu mai Timor-Leste, tanba ne’e ba lubun ida kedas ni preokuasaun ne’e loos tebes duni.
Viajen ba rai-liur ne’e buka atu evita maibé mós problema ASEAN nian iha 1500 reuniaun kada tinan, no foin daudaun Governu Konstitusionál da-ualu asina akordu, ein-prinsípiu Timor-Leste atu tama tanba Prezidente Repúblika ko’alia tiha ona ASEAN.
“Ha’u atu dehan de’it ba ita-boot sira katak, iha 2025 ha’u sei forma Governu ida serbisu iha rai-laran no ida atu ba de’it reuniaun iha ASEAN. Problema mak ida-ne’e duni, ita dehan atu tama ASEAN maibé ami preparasaun iha pesoál tékniku, séemak atu ba no la ba. Tanba iha duni área nível ministeriál ministru mak ba, ida sekretária Estadu ka vise ministru mak ba no iha fali tékniku, diretór jerál, buat ida ita labele Evita. Maibé atu dehan 2025 ita tama tiha, ita sei la evita, la’ós ministru sira mak atu ba hotu, ami haree buat ne’e no ko’alia hela ho sekretáriu jerál ASEAN ninian hodi hatene área ida-ne’e,” PM Xanana hateten.
Jornalista : Nelson de Sousa
Editór : Cancio Ximenes
