DILI, 07 novembru 2024 (TATOLI)—Deputada FRETILIN, Maria Angelica Rangel, husu Governu atu kapitaliza tan osan iha Banku Nasionál Komérsiu Timor-Leste (BNCTL, siglá portugés), hodi fó kréditu ba empreza barak liu-tán nune’e bele haburas liu-tán ekonomia iha rai-laran.
“Atu diversifika ekonomia, meiu ida mak Governu tenke kapitaliza ita-nia banku rasik, hanesan BNCTL, aumenta kapitál ba BNCTL atu nune’e banku bele fó kréditu boot ba empreza sira ne’ebe hakarak loke indústria ou halo negósio boot iha ita-nia nasaun,” Deputada FRETILIN ne’e hato’o iha intervensaun ba debate proposta Orsamentu Jerál Estadu (OJE) 2025 iha faze jeneralidade ba loron daruak iha sala plenária Parlamentu Nasionál (PN), kinta ne’e.
Governu labele haree fali likídez BNCTL ne’ebé boot hodi la aumenta kapitál, mezmu likídes boot bainhira banku fó kréditu barak sei afeta ba Capital Adequacy Ratio (CAR) sei menus ba beibeik, tuir padraun banku sentrál, banku sira tenke mantein CAR labele menus husi 12%.
Kapitaliza osan iha BNCTL, sei fó benefísiu no haburas liután ekonomia rai-laran nomós hanesan meiu ida hodi hatama reseita ba kofre Estadu.
Enkuantu, iha relatóriu setoriál no paréser komisaun D trata asuntu Ekonomia ninia rekomendasaun ne’e, iha pontu ida mós ba iha proposta OJE 2025 mak hakarak rekomenda atu Governu toma konsiderasaun ba proposta BNCTL kona-ba kapitalizasaun ne’ebé nia dirije tiha ona ba Vise-Ministru Asuntu Ekonómiku.
Entretantu, iha diskusaun proposta OJE 2025 faze jeneralidade loron daruak, parte Governu hatán de’it pergunta jerál husi Deputadu sira no asuntu sira seluk Governu sei responde iha debate faze espesialidade.
Jornalista : Nelson de Sousa
Editór : Cancio Ximenes
