DILI, 07 novembru 2024 (TATOLI)—Deputada PLP, Maria Angelina Sarmento, preokupa ho kollesaun reseita doméstika kontinua kiik, nune’e Governu presiza halo reforma fiskál hodi bele rekolla liután reseita doméstika.
“Iha livru relatóriu pajina 25 hatuur na ausência de novas receitas petrolíferas, o governo tem três opções principais para prolongar a vida útil do fundo petrolífero. Dahuluk, reformas para aumentar as receitas domésticas. Faktu hatudu katak reseita doméstika kada tinan seidauk bele atinje millaun $300. Daruak, medida para reduzir as despeza pública–bele fó hatene ami despeza públika ida-ne’ebé mak pretende atu redús. Osan ba saláriu no vensimentu 2025 hetan aumentu $ 21.132,690 (4.7%). Osan ba transferensia públika mak 30.9%,” Nia hateten iha intervensaun ba debate proposta OJE 2025 iha faze jeneralidade ba loron daruak iha sala plenária PN, kinta ne’e.
Datolu, nai dehan, aumentar as fontes alternativas de receitas como empréstimos e doações, doações labele konsidera nu’udar fonte reseita tanba nu’udar país ho rendimentu médio-alto, nune’e TL elijivel ona atu hetan empréstimu hahú 2012, aumezmu tempu apoiu doadór mós hahú tun no keta haluha katak TL sei iha kategoria país Least Develop Country.
Deputada FRETEILIN, Maria Angelica Rangel, dehan proposta lei OJE 2025 ne’e, propoin biliaun $2,6 ka sa’e 13% kompara ho OJE 2024, no orsamentu ba sub-setór administrasaun sentrál biliaun $2.07 ka sa’e 12%, seguransa sosiál millaun $482 no RAEOA millaun $62.
Lei orsamentu tenke haree husi parte reseita no despeza, reseita ne’ebé atu finansia despeza 73% kontribui husi fundu petrolíferu, enkuantu reseita doméstika kiik tebes, apenas kontribui de’it 12%.
Nune’e, oinsá ho Governu nia promesa sira iha programa Governu ne’ebe hatete katak atu halo reforma ba jestaun finansa públika liuhusi forma diversifika reseita no rasionaliza despeza hodi promove sustentabilidade fiskál.
Bazeia ba dadus projesaun ba reseita doméstika ne’ebé Governu halo hatudu katak to’o tinan lima oin mai, Governu nia kapasidade atu rekolla reseita doméstika to’o de’it millaun $324, reforma saida mak ida ne’e.
Dadus ida-ne’e hatudu katak, Governu sei laiha kbiít atu realiza nia promesa sira ba diversifikasaun reseita no laiha balansu ho espansaun iha despeza públika ne’ebé kontinua sa’e tina-tinan.
Aát liután, nia hateten, projesaun ida-ne’e mós sei labele ajuda Estadu atu finansia saláriu vensimentu ba traballadór Estadu,” nnia dehan.
Enkuantu, iha relatóriu no paréser komisaun C trata asuntu Finansa Públika ba proposta OJE 2025 ne’e, rekomenda ba Governu atu halo promosaun ba reforma tributária sira-ne’ebé habelar baze tributária no introdús progresividade iha impostu sira, aprovasaun ba lei foun sira, hanesan implementasaun IVA no impostu seletivu, bele aumenta kobransa reseita doméstika, hamenus presaun ba fundu petrolíferu.
Entretantu, Ministériu Finansa (MF) iha proposta Orsamentu Jerál Estadu (OJE) 2025 prevee $18,889,241, hodi tau prioridade haree lejislasaun no medida sira atu bele aumenta kollesaun reseita naun petrolífera.
“Ministériu Finansa nia polítika liuliu ba kollesaun reseita não petrolíferu nian ba kollesaun reseita nian ba área ida-ne’e iha medida mak sai parte xave ba MF mak haree ba lei sira. Se kona-ba reseita nian, ami serbisu hela kona-ba IVA, ida-ne’e sei akompaña hasa’e impostu ba venda no taxa importasaun balun. Nu’udar parte ida husi ASEAN hodi halo sistema impostu sai simples liu, justu no fásil liu atu administra. Liuhusi ne’e ho esperansa ne’ebé rekolla tan reseita boot no haburas ekonomia,” Vise Ministra Finansa, Felícia Claudinanda Cruz, hato’o iha audiénsia públika ba proposta OJE 2025 husi ministériu nian ho komisaun C trata asuntu Finansa Públika no Komisaun D trata asuntu Ekonomia no Dezenvolvimentu iha sala plenária PN, (25 outubru 2024).
Sistema sira, nia dehan. MF iha planu atu atualiza SIKTAS ne’ebé mak husi autoridade tributária no asikuda husi autoridade aduoneira nian tuir no hanoin atu intrega baze dadus sira-ne’e ho GRP no mós analiza sistema finanseira.
Sei hadi’a infraestrutura finanseira hodi muda pagamentu sira lahó osan cash ka osan tahan difikulta ba evazaun fiskál.
Tanba, sira haree dalan ba tranzasaun sira-ne’ebé subsajente no hametin administrasaun impostu, hadi’a efisiénsia kobransa impostu nian, habelar baze impostu nian no hamenus evazaun impostu mak krítiku.
Governu bele hametin kapasidade husi autoridade fiskál no adota ferramenta dijitál modernu sira hodi hasa’e komprimentu no tranferénsia.
Tuir dokumentu livru proposta OJE 2025 Planu Asaun Annual Entidade públiku setór administrativu, ba tinan oin MF iha programa jestaun finansa públika ho sub-programa mellora despeza públika ho atividade 13, sub-programa aumenta kolesaun reseita doméstika 14, sub-programa jestaun patrinómiu Estadu ho atividade haat, sub-programa mobilizasaun dívida públika no ajuda esternu ho atividade tolu, sub-programa polítika no jestaun fundu petrolífeiru ho atividade rua, sub-programa rekolla dadus ho atividade tolu.
Programa funsionamentu no dezenvolvimentu instituisionál ho sub-programa tolu no atividade 25.
Jornalista : Nelson de Sousa
Editór : Cancio Ximenes
