BAUCAU, 07 novembru 2024 (TATOLI) – Governu liuhusi Sekretaria Estadu Igualdade (SEI), motiva feto iha Postu Administrativu Quelicai atu barani hakat sai husi presaun kulturál.
Sekretária Estadu Igualdade (SEI), Elvina Sousa Carvalho, esplika, motivasaun referida hato’o ba feto hotu relasiona ho selebrasaun loron nasionál feto nune’e hodi hetan korajen no forsa nafatin atu hakat tuir eroína ne’ebé sakrifika aan mate hodi hetan libertasaun.
“Selebrasaun ne’e, ita uza mos hanesan reflesaun para hodi hakat ba oin, hasai feto husi nakukun laran, hanesan kulturál ne’ebé mak hanehan demais feto la fo oportunidade ba feto,” Sekretária Estadu Igualdade hateten iha Quelicai, kinta ne’e.
“Ohin loron importante tebes ita hotu hatene katak, atu selebra loron feto Timor nian korajen feto Timor nia sentidu nasionalizmu no feto Timor nia aten barani,” nia dehan.
Governante ne’e, konsidera, ema hotu direitu hanesan tuir lei ne’ebé konsagra iha K-RDTL maibé feto presiza envolve iha prosesu dezenvolvimentu mesmu sistema kulturál kontinua la fó oportunidade.
Tanba ne’e, liuhusi selebrasaun loron nasionál feto bele motiva ba Feto Timor-Leste atu barani tebes foti risku ba nia aan hodi partisipa iha konstrusaun estadu.
Eis deputada ne’e, rekoñese, maske pursentajen partisipasaun feto sei kiik maibé atúal involvementu hetan oportunidade hanesan partisipa iha Parlamentu Nasional atinjimentu pursentu 40, no iha Governu pursentu 13.
Enkuantu iha área Administrasaun Publiku feto foti dezisaun ba kargu Prezidente Autoridade Munisípiu nain-rua no na’in-tolu mak atuál iha administradora postu administrativu.
“Loron ohin sai loron reflesaun, bele inspira fali feto maluk seluk liuliu feto foinsa’e sira atu nafatin respeita no valoriza kontribuisaun feto barani sira nian,” Elvina hateten.
Jornalista : Natalino Belo
Editór : Evaristo Soares Martins
