COVALIMA, 08 Novembru 2024 (TATOLI) – Administradór Postu Administrativu Tilomar, Venâncio Sarmento, husu ba Diretór Servisu Saúde Covalima, Domingos Sequeira, atu buka solusaun ba problema konstrusaun edifísiu postu saúde Rai Hun, iha suku Beikseuk, ne’ebé seidauk inaugura maibé nia aliserse nakfera ona.
“Empreza finaliza konstrusaun, maibé tanba natureza halo aliserse nakfera. Prosesu atu buka solusaun to’o ona iha ne’ebé ita la hatene, tanba to’o ohin loron seidauk iha rezultadu”, Autoridade postu Tilomar kestiona iha AMC, ohin.
Autortidade Tilomar ne’e preokupa tanba, foin lalais, komunidade hulan de’it inan isin-rua husi suku Beiseuk bá to’o iha sentru saúde Tilomar ne’ebe lokaliza iha suku Maudemo.
Tanba ne’e, nia rekomenda ba diretór Saúde Covalima konfirma prosesu ne’e iha Ministériu Saúde (MS) no ba empreza ne’ebé halo konstrusaun ba postu saúde Rai Hun, tanba obra ne’e finaliza ona no seidauk uza, maibé nia aliserse nakfera no uma ne’e mós nakfera iha klaran.
“Se bele hato’o ami-nia preokupasaun ba Ministériu Saúde. Ekipa bele tuun direta atu haree kondisaun hodi buka ona solusaun, nune’e pesoál sira hela ona hodi halo atendimentu tanba komunidade hela iha bairru Rai Hun dook atu bá konsulta iha sentru saúde Tilomar”, nia fó hanoin.
Diretór Servisu Saúde Covalima, Domingos Sequeira, hatán katak konstrusaun Postu Saúde Rai Hun nia prosesu to’o ona iha nasionál, tanba ne’e hein de’it nia rezultadu.
Postu Saúde Rai Hun konstrui husi empreza Carame Unip, Lda ne’ebé hahú obra iha 18 Agostu 2021 no finaliza iha 17 Fevereiru 2022, maibé to’o ohin loron seidauk hala’o inaugurasaun.
Bazeia ba kontratu, empreza hala’o konstrusaun ho durasaun tempu fulan neen ho totál orsamentu $29.785,42.
Notísia relevante: Postu saúde Rai Hun ladauk utiliza tanba laiha kualidade obra
Jornalista: Celestina Teles
Editora: Maria Auxiliadora
