DILI, 08 novembru 2024 (TATOLI)–Membru Rede Advokasia iha Asia Justice And Right (AJAR), Inocencio Xavier, sujere ba Xefe Governu ka Primeiru-Ministru atu husu responsabilidade ba Ministra Saúde no vise na’in rua konaba servisu ospitalár.
Nia esplika, planu Governu Konstitusinál da-ualu (VIII) nian, iha loron 120 atu rezolve problema, tanba ne’e mak iha orsamentu retifikativu inklui ai-moruk, molok tama ba orsamentu 2024 no agora tama ba orsamentu 2025 nian tenke selu dividas sira iha rai-li’ur.
“Ami husu ho respeitu ba Primeiru-Ministru atu obriga ministra ho nia vise na’in-rua atu iha responsabilidade ba serbisu. Husu ba Ministra Saúde, Elia Amaral, tenke rezigna aan, atu labele sakrifika povu liuliu pasiente sira,” Membru Rede Advokasia iha Asia Justice And Right (AJAR), Inocencio Xavier, hateten ba jornalsita sira liuhusi konferéneia emprensa nakait ho pasiente na’in-80 ne’ebé seidauk halo transferénsia ba rai-li’ur tanba dívida seidauk selu, iha Colmera.
Nia haktuir, ema tara aan iha ospital buat babain de’it, loloos ministra rezigna aan iha loron ne’e kedas tanba ema mate iha ninia responsabilidade.
Membru AJAR ne’e admira ho Primeiru-Ministru no Parlamentu Nasionál ne’ebé laiha kbiit atu hateten ba Ministra saúde, Elia Amaral atu bele komporta no responsabiliza ba pasiente sira no atu jere didi’ak Hospital Nasionál Guido Valadares ho di’ak.
Tuir nia, ema ne’ebé mate tanba moras ne’e normál, maibé mate tanba falta kondisaun ne’e violasaun direitu umanu.
“Ami ema -e’ebé servisu ba iha direitu umanu, ami kondena hanesan país demokrátiku, ministra ida lá ezerse nia funsaun hodi fó resposta ba iha nesesidade interrese públiku tuir lolos ne’e ministra ne’e rezigna aan de’it, la presiza ema ida husu,” nia dehan.
Nia relembra, Prezidente Repúblika no bispu sira husi dioseze tolu no opozisaun sira iha Parlamentu Nasionál preokupa, maibé ministra nunka rona no Primeiru-Ministru finje la rona.
“Ha’u adminira ema ida-nia pozisaun no estraga povu nia vida ka ita hasai ema ida hodi tau ema seluk ne’ebé kompetente atu iha responsabilidade hodi salva vida nasaun no povu ka pasiente,” nia hateten.
Iha fatin hanesan, Diretór Ezekutivu FONGTIL, Valentim da Costa Pinto, rekomenda ba Governu atu hadi’a sistema saúde iha rai-laran hanesan dezenvolve sentru kardiovaskulár.
“Ami-nia sujestaun di’ak-liu kompra ekipamentu modernu atu populasaun hotu-hotu ne’ebé la iha kapasidade kompra mós bele hetan atendimentu iha rai-laran, tanba burokrasia tratamentu ba rai-li’ur ne’e,” nia dehan.
Tuir nia, prosesu dezenvolvimentu ba iha sentru hahú la’o, entaun Governu tenke aselera hodi responde ba iha pasiente sira.
Jornalista : Jesuína Xavier
Editór : Cancio Ximenes
