DILI, 08 novembru 2024 (TATOLI)—Deputadu husi bankada Partidu Demokrátiku (PD) iha Parlamentu Nasionál (PN), Manuel Noronha, konsidera krítika sira husi bankada opozisaun ne’e atu fanu Governu Konstitusionál da-sia hodi hadi’a liután serbisu iha tinan 2025.
“Hanesan bankada Governu, ami apresia no agradese ba bankada opozisaun ne’ebé durante ne’e sempre krítika no krítika ida bele fanu Governu da-sia atu bele halo serbisu di’ak liután,” nia hateten iha intervensaun iha debate proposta Orsamentu Jerál Estadu (OJE) 2025 iha faze jeneralidade ba loron datoluk iha sala plenária PN, sesta ne’e.
Tuir Nia, iha nasaun ida iha PN sempre iha bankada Governu no bankada opozisaun, rua ne’e hamutuk hodi halo polítika iha palku PN ninian, maibé opozisaun sira-nia krítika ne’ebé konstrutivu no konsentra, ida-ne’e konsidera fanu Governu duni atu bele hala’o serbisu di’ak liután.
Deputadu CNRT, Patrocínio dos Reis Fernandes, hateten krítika husi opozisaun bele fó hanoin sira fuan atu apoiu Governu ida-ne’e serbi povu ida-ne’e, nune’e presiza fó hanoin atu Governu ida-ne’e dezempeña nia serbisu di’ak liután maibé krítika ida konstrutivu.
Hanesan iha tinan kotuk, iha apresiasaun programa Governu Konstitusionál da-sia, parte opozisaun FRETILIN rasik hato’o katak hamutuk la signifika envolve iha governasaun, ida-ne’e hatudu bankada opozisaun sei partisipa iha ninia kritika sira konstrutivu atu apoiu Governu ida-ne’e halo ninia serbisu hodi serbí povu.
Tanba ne’e, liuhusi intervensaun sira-ne’e sei menus iha área balun hanoin ne’e enkoraja atu Governu ida-ne’e hadi’a serbisu liután hanesan edukasaun, saúde no seluk tan.
Entretantu, iha debate proposta OJE 2025 faze jeneralidade ohin tama loron datolu ne’e deputadu sira opozisaun preokupa alokasaun orsamentu ba setór produtivu hanesan agrikultura, turizmu no setór saúde, edukasaun, no sira seluk tan.
Inklui, Governu kontinua foti osan liu Rendimentu Sustentável Estimadu (RSE) iha fundu petrolíferu haree ba presipísiu fiskál besik daudaun, nune’e husu tau atensaun ba reforma fiskál hodi aumenta kollesaun reseita doméstika inklui redús despeza públika.
Jornalista : Nelson de Sousa
Editór : Cancio Ximenes
